ޖަރުމަނުގެ މިހާރުގެ ޗާންސެލަރު އޮލަފް ޝޯލްޒް އަދި އެމެރިކާގެ އިންތިޚާބީ ރައީސް ޑޮނަލްޑް ޓްރަމްޕާ ބައްދަލުކުރައްވާ ގޮތަށް ރައީސް ޕޫޓިން އެޖެންޑާގައި އައިޓަމެެއް މި ވަގުތު ނެތް ކަމަށް ރަޝިއާގެ ރިޔާސީ ގަނޑުވަރު، ކްރެމްލިންގެ ތަރުޖަމާން ދިމިތުރީ ޕެސްކޯފް ވިދާޅުވެއްޖެ އެވެ.
ދިމިތުރީ ޕެސްކޯފް މި މޭރުމުން ވިދާޅުވި ސަބަބަކީ، ޖަރުމަނުގައި ފެބްރުއަރީ 23 ގައި އޮންނަ އަވަސް އިންތިޚާބުގެ ކުރިން އެ ގައުމުގެ ޗާންސެލަރުގެ މަގާމުގައި މި ވަގުތު ހުންނެވި އޮލަފް ޝޯލްޒް ރަޝިއާއަށް ވަޑައިގެން ލަޑިމިއާ ޕޫޓިންއާ ބައްދަލުކުރައްވާނެ ކަމަށް ޖަރުމަނުގެ ގާނޫންހަދާ މަޖިލީހުގެ މެމްބަރު، ވޯޑަވިޝް ކީސަވެޓާ މިހެން ވިދާޅުވެ އެކްސްގައި ކުރެއްވި ޕޯސްޓަކާ ގުޅިގެންނެވެ.
ރަޝިއާގެ ރައީސް ޕޫޓިން އަންނަ މާޗުގައި ޑޮނަލްޑް ޓްރަމްޕާ ބައްދަލުކުރައްވާނެ ކަމަށްވެސް ވޯޑަވިޝް ކީސަވެޓާގެ ޕޯސްޓްގައި ވެއެވެ. ނަމަވެސް، މި ޕޯސްޓް މިހާރު ވަނީ އެކްސްއިން ގެއްލިފަ އެވެ.
އޯލަފް ޝޯލްޒް މި ވަގުތު ޖަރުމަނުގެ ޗާންސެލަރުގެ މަގާމުގައި ހުންނެވި ނަމަވެސް، އޭނާގެ ކުރިމަގާ މެދު ދެން ގޮތެއް ނިންމާނީ ފެބްރުއަރީގައި އޮންނަ އިންތިޚާބުންނެވެ.
ފަހަރުގައި ކަންދިމާކުރާ ގޮތުން އޭނާ ނޫން މިހަކު ޗާންސެލަރުގެ މަގާމަށް ހޮވުމަކީވެސް އެކަށީގެންވާ ކަމެކެވެ.
ރިޕޯޓްތައް ބުނާ ގޮތުން އެމެރިކާގެ އިންތިޚާބީ ރައީސް ޖެނުއަރީ 20 ގައި މަގާމާ ހަވާލުވެވަޑައިގަތުމަށް ފަހު ޕޫޓިންއާ ބައްދަލުކުރައްވާނެ އެވެ. އެކަމަކު މި ބައްދަލުވުމަށް އަދި ތާރީޚެއް އާންމެއް ނުކުރެ އެވެ.
ޑޮނަލްޑް ޓްރަމްޕް ދެކެވަޑައިގަންނަވާ ގޮތުގައި ޕޫޓިންއާ މަޝްވަރާ ނުކުރައްވައި، ޔުކްރޭން ހަނގުރާމަ ކޮޅެއްގައި ނުޖެއްސޭނެ އެވެ. މިހެންކަމުން، ރަޝިއާގެ ވެރިން އަދި ޔުކްރޭންގެ ވެރިން ހިމެނޭ ގޮތުން މަޝްވަރާ މޭޒުދޮށަށް ޖަމާވުން މުހިންމު ކަމަށް ޓްރަމްޕް ވިދާޅުވި އެވެ.
ޔުކްރޭން ހަނގުރާމަ ހުއްޓުވުމަކީ ޓްރަމްޕްގެ ރިޔާސީ ވައުދެކެވެ.