ރަށްރަށުގައި ހުރި ކުނި މެނޭޖުކުރާ ސެންޓަރުތަކުގެ ފެންވަރު ރަނގަޅު ކުރުމުގެ މަސައްކަތް މި އަހަރު ފަށާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ގދ. ރަތަފަންދޫއަށް މިއަދު ވަޑައިގެން އެ ރަށު ރައްޔިތުންނާ ބައްދަލުކުރައްވާ ރައީސް މުއިއްޒު ވިދާޅުވީ ކުނީގެ މައްސަަލައަކީ ރާއްޖެއަށް ހުރިހާ ރަށަކަށްވެސް ކުރިމަތިވެފައި އޮތް ބޮޑު މައްސަލައެއް ކަމަށެވެ. އެހެންވެ އެ މައްސަލަ ހައްލުކުރުމަށްޓަކައި އެ ރަށެއްގެ އާބާދީއާ އެއްވަރުގެ ކުނި މެނޭޖުކުރާ ސެންޓަރުތަކެއް ހެދުމަށާއި އަދި މިހާރު ހުރި ތަންތަނުގެ މައްސަލަތައް ހައްލުކުރަން މިއަހަރު މަސައްކަތް ފަށާނެ ކަމަށެވެ.
"ވޭސްޓް މެނޭޖްމަންޓު ސެންޓަރެއް އަޅުގަނޑުމެން މި ރަށުގައިވެސް ގާއިމުކޮށްދޭނަން،" ރަތަފަންދޫގެ ކުނީގެ މައްސަލަ ހައްލުކުރުމަށް މަސައްކަތް ކުރައްވާނެކަން ފާހަގަކުރައްވާ ރައީސް ވިދާޅުވި އެވެ.
ރަތަފަންދޫއަށް ކޮށްދެއްވާނެ ބައެއް ކަންކަންވެސް ރައީސްގެ ވާހަކަފުޅުގައި ހިއްސާކުރެއްވި އެވެ. އެގޮތުން ވިދާޅުވީ އެ ރަށުގެ ފެނާއި ނަރުދަމާގެ އިތުރުން ސިއްހީ މަރުކަޒުގެ ހާލަތު ރަނގަޅުކޮށްދެއްވާނެ ކަމަށާއި ސްކޫލަށް ދިމާވެފައިވާ ޖާގައިގެ ދަތި ކަމަށްވެސް ހައްލު ހޯއްދަވައިދެއްވާނެ ކަމަށް ވިދާޅުވި އެވެ. އަދި އިންޑޯ ޖިމަކާއި ޔޫތު ސެންޓަރެއް އެ ރަށުގައި އަޅައިދޭނެ ކަމުގައިވެސް ވިދާޅުވި އެވެ.
ރަތަފަންދޫ އަކީ ރައީސް މުއިއްޒު މިހާރު ހުވަދު އަތޮޅަށް ކުރައްވާ ދަތުރުފުޅުގައި ގދ. އަތޮޅުން ވަޑައިގަންނަވާ ފަހު ރަށެވެ.