މާލެއިން 13،882 ޓަނުގެ ފެން ހިންދާފައިވާ ކަމަށް އެމްއެންޑީއެފް އިން ބުނެފި އެވެ.
މާލެއަށް ދަންވަރު ބޯކޮށް ވާރޭ ވެހުމާއި ގުޅިގެން މަގުތަކުގައި ފެން ބޮޑުވެ އެތައް ބައެއްގެ އާއްމު ދިރިއުޅުމަށް ވަނީ ދަތިވެފަ އެވެ.
އެމްއެންޑީއެފް އިން ބުނީ ފަޔާ އެންޑް ރެސްކިޔު އިން މާލޭގެ އަށް ސަރަހައްދެއްގައި 23 ޕަންޕު ބަހައްޓައިގެން ފެން ހިންދުމުގެ މަސައްކަތް ކުރަމުންދާ ކަމަށެވެ.
އެގޮތުން ވެސްޓްޕާކް ސަރަހައްދާއި އައިޖީއެމްއެޗް ސަރަހައްދާއި ވިލިމާލެ ފެރީ ޓާމިނަލް ސަރަހައްދުގައި ޕަންޕް ބަހައްޓައިގެން ފެން ހިންދުމުގެ މަސައްކަތް ދަނީ ކުރަމުންނެވެ.
މީގެ އިތުރުން ސަލްމާން މިސްކިތް ސަރަހައްދާއި ބޮޑު ވަޅު ސަރަހައްދުގެ އިތުރުން ދަރުބާރުގެ ސަރަހައްދާއި ހަވީރީހިނގުން އަދި ސޯޝަލް ސެންޓަރު ކައިރީގައި ޕަންޕު ބަހައްޓައިގެން ދަނީ ފެން ހިންދަމުންނެވެ.
މޫސުމާބެހޭ ގައުމީ އިދާރާ -- މޯލްޑިވްސް މީޓިއޮރޮލޮޖިކަލް ސާވިސް (މެޓް އޮފީސް) އިން ހާމަކުރި ގޮތުގައި ފާއިތުވި 24 ގަޑިއިރުގެ ތެރޭގައި އެންމެ ގިނައިން ވާރޭ ވެހިފައިވަނީ މާލެ އަށެވެ.
މެޓް އޮފީހުން ހާމަކުރި ގޮތުގައި އިއްޔެ ހެނދުނު 8:00 އިން މިއަދު ހެނދުނު 8:00 އަށް މާލެއަށް 130.7 މިލިމީޓަރުގެ ވާރޭވެހިފައިވެ އެވެ.