ބަހާމާސްގެ ކްރޫޒް ޝިޕަކުން 200 އަށް ވުރެ ގިނަ ފަތުރުވެރިން ރާއްޖެއަށް އައިސްފި އެވެ.
ކްރިސްޓަލް ސިމްފޮނީ ނަމަކަށް ކިޔާ ކުރޫޒް ޝިޕް 212 ފަތުރުވެރިންނާއެކު ބުރާސްފަތި ދުވަހު ވަނީ މާލެއަށް އައިސްފަ އެވެ.
މި ކުރޫޒް ޝިޕަކީ މިހާރު ކުރިއަށްދާ ފަތުރުވެރިކަމުގެ ސީޒަންގައި މާލެއަށް އައި ހަތަރުވަނަ ކުރޫޒް ޝިޕެވެ.
މޯލްޑިވްސް އެސޯސިއޭޝަން ފޯ ޔޮޓް އޭޖެންޓްސް (މާޔާ) އިން މައުލޫމާތުދޭ ގޮތުގައި ބަހާމާސްގެ މި ކުރޫޒް ޝިޕް ރާއްޖެއަށް އައިސްފައިވަނީ ސީޝެލްސް އިންނެވެ. އަދި މިއަދު ސްރީލަންކާއަށް ފުރުމަށް ވަނީ ހަމަޖެހިފަ އެވެ.
މާޔާއިން އިތުރަށް ބުނި ގޮތުގައި މިދިޔަ މަހުގެ 30 ވަނަ ދުވަހު ސީޝެލްސް އިން ދެ ކުރޫޒް ޝިޕެއް ރާއްޖެއަށް އައިސްފައިވެ އެވެ. މި ދެ ޝިޕްގައި 3،000 އަށްވުރެ ގިނަ ފަތުރުވެރިން ރާއްޖެއަށް ޒިޔާރަތްކުރި އެވެ. އަދި ފަތުރުވެރިކަމުގެ ސީޒަން ނިމުމުގެ ކުރިން އިތުރު 12 ކުރޫޒް ޝިޕް ރާއްޖެއަށް އައުމަށް ހަމަޖެހިފައިވެ އެވެ.
ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކާ ގޮތުގައި މި އަހަރުގެ ފުރަތަމަ ހަފްތާގައި 43،000 އަށް ވުރެ ގިނަ ފަތުރުވެރިން ރާއްޖެއަށް ޒިޔާރަތްކޮށްފައިވެ އެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު 9.7 އިންސައްތައިގެ އިތުރުވުމެކެވެ.