މާލޭގެ މާފަންނުކޮޅުގައި މިވަގުތު ފެންބޮޑުވަނީ އެ ސަރަހައްދުގައި ހަދާފައިވާ ސްޓޯމްވޯޓާ ޕަމްޕް ސްޓޭޝަން ނުވަތަ ފެން ހިންދާ ނިޒާމަށް މާލެ ސިޓީ ކައުންސިލްގެ އިހްމާލުން ގެއްލުންތަކެއް ލިބިފައިވާތީ ކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބް ވިދާޅުވެއްޖެ އެވެ.
މުއްތަލިބް މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ މާފަންނު ސަހަރާގެ ބައެއް ހުސްކުރުމަށް މާލެ ސިޓީ ކައުންސިލުން މިހާރު އެ ސަރަހައްދުގައި ކުރަމުންދާ މަސައްކަތްތަކުގެ ތެރެއިން އެ ސަރަހައްދުގައި ހުރި ސްޓޯމްވޯޓާ ޕަމްޕް ސްޓޭޝަނަށް ގެއްލުންތަކެއް ލިބިފައިވާ ކަމަށެވެ.
މާލެ ސިޓީ ކައުންސިލުން އެ މަސައްކަތް ކުރަނީ ކޮންސްޓްރަކްޝަން މިނިސްޓްރީގެ ހުއްދައެއް ނެތި ކަމަށްވެސް މުއްތަލިބް ތުހުމަތު ކުރެއްވި އެވެ. އަދި ސިޓީ ކައުންސިލުން މާފަންނު ސަހަރާގެ ކައިރީގައި މަސައްކަތް ކުރަނީ ވަރަށް ޒިންމާދާރުކަން ކުޑަކޮށް ކަމަށްވެސް ވިދާޅުވި އެވެ.
"އެ މަސައްކަތުން ލިބުނު ގެއްލުމާ ގުޅިގެން މާފަންނު ސަރަހައްދުގައި ފެންބޮޑުވުމުގެ މައްސަލަ ދިމާވަމުންދާކަން ފާހަގަވޭ،" މުއްތަލިބް ވިދާޅުވި އެވެ.
މިނިސްޓަރު އިތުރަށް ވިދާޅުވީ ޕަމްޕް ސްޓޭޝަނަށް ލިބުނު ގެއްލުން ބަލައި އެ މައްސަލަ ހައްލުކޮށް އާންމު ހާލަތަށް ގެނައުމުގެ މަސައްކަތް ފަށާފައިވާ ކަމަށެވެ.
މާލޭގެ މާފަންނު ކޮޅަކީ މާލެއަށް ވާރޭ ވެހިއްޖެނަމަ ވަރަށް އަވަހަށް އަދި ވަރަށް ބޮޑަށް ފެންބޮޑުވާ ސަރަހައްދެކެވެ.