ދައުލަތަށް މިދިޔަ އަހަރު ލިބުނު ޑޮލަރު އާމްދަނީ އެއް ބިލިއަން ޑޮލަރަށް އަރައިފި އެވެ.
މޯލްޑިވްސް އިންލަންޑް ރެވެނިއު އޮތޯރިޓީ -- މީރާގެ ތަފާސްހިސާބުތަކަށް ބަލާއިރު ފާއިތުވި 2024 ވަނަ ޑޮލަރުން ލިބުނު އާމްދަނީ ވަނީ 2023 ވަނަ އަހަރަށްވުރެ 12.5 ޕަސެންޓް އިތުރުވެފަ އެވެ.
ޑޮލަރު އާމްދަނީގެ ގޮތުގައި 2023 ވަނަ އަހަރު ދައުލަތަށް ލިބުނީ 949.7 މިލިއަން ޑޮލަރެވެ.
ޑޮލަރު އާމްދަނީ އިތުރުވި ސަބަބުތަކުގެ ތެރޭގައި ރާއްޖެ ޒިޔާރަތްކުރި ފަތުރުވެރިންގެ އަދަދު މިދިޔަ 2024 ވަނަ އަހަރު އިތުރުވެ ޓޫރިޒަމް ދާއިރާގެ ޓެކްސްތަކުގެ ތެރޭގައި ހިމެނޭ ޓީޖީއެސްޓީ އާއި ގްރީން ޓެކްސްގެ އިތުރުން އެއާޕޯޓް ޓެކުހާއި ފީ ލިބުނު މިންވަރު އިތުރުވުން ހިމެނެ އެވެ.
ދައުލަތަށް މިދިޔަ އަހަރު ލިބުނު ޑޮލަރު އާމްދަނީގެ ތެރެއިން 619.9 މިލިއަން ޑޮލަރު ލިބުނީ ޓޫރިޒަމް ދާއިރާގެ ޖީއެސްޓީ އިންނެވެ.
ޑިޕާޗާ ޓެކްސްގެ ގޮތުގައި 72.2 މިލިއަން ޑޮލަރު ލިބުނުއިރު އެއާޕޯޓް ޑިވެލޮޕްމަންޓް ފީގެ ގޮތުގައި 73.2 މިލިއަން ޑޮލަރު އަދި ގްރީން ޓެކްސްގެ ގޮތުގައި 70.4 މިލިއަން ޑޮލަރު މިދިޔަ އަހަރު ލިބުނެވެ. މީގެ އިތުރުން އިންކަމް ޓެކްސްގެ ގޮތުގައި 55.9 މިލިއަން ޑޮލަރު ލިބުނެވެ.