ޔުކްރޭންގައި ތިބި ތަޖުރިބާކާރު އަލިފާން ނިއްވާ މީހުން އެމެރިކާއަށް ފޮނުވަން ތައްޔާރު ކަމަށް އެ ގައުމުގެ ރައީސް ޒެލެންސްކީ ވިދާޅުވެއްޖެ އެވެ. އޭނާ ވިދާޅުވި ގޮތުން 150 މީހުން މިހާރުވެސް ތިބީ ތައްޔާރަށެވެ.
އެމެރިކާގެ ކެލިފޯނިއާ ސްޓޭޓްގެ ލޮސްއެންޖަލިސް ސިޓީގައި މިމަހު ހަތްވަނަ ދުވަހު ރޯވި އަލިފާންގަނޑު އަދިވެސް އަނދަނީ އެވެ.
އަލިފާންގަނޑު ބޮޑު ސަރަހައްދަކަށް ފެތުރި ލިބުނު ގެއްލުން 145 ބިލިއަން ޑޮލަރު ފަހަނައަޅާފައިވާ ކަމަށް ރިޕޯޓްތައް ބުނެ އެވެ.
މިއީ އެމެރިކާގެ ހަޔާތުގައި މިވަރުގެ ބޮޑުގެއްލުމެއް ލިބުނު ފުރަތަމަ ހާދިސާ ކަމަށް ތާރީޚް ޖަހާ މީހުން ބުނެ އެވެ.
ކެލިފޯނިއާގެ އަލިފާނގަޑު ކޮންޓްރޯލް ނުވެ ފެތުރެމުންދާނަމަ، މާލީ ގޮތުން އެމެރިކާއަށް ނުކަތާ ވަރުގެ ގެއްލުންތަކެއް ކުރިމަތިވާނެ ކަމަށް މިހާރުވެސް ވަނީ ބެލެވިފަ އެވެ.
އަލިފާން ނިއްވާ މީހުން ހުޅުގަނޑު މައިތިރިކުރުމަށް ކުރަމުންދާ މަސައްކަތްތަކުން ކުރިއެރުމެއް ނުލިބޭ ކަމަށް ހަބަރުތައް ބުނެ އެވެ. ހުޅުހިފާ ކޮންމެ ތަނަކުން ހުޅުގަނޑު މައިތިރި ވަނީ މުޅި ތަން އަނދާ ހުލިވުމަށްފަހު ކަމަށްވެސް ހަބަރުތައް ބުނެ އެވެ.
އަލިފާން ނިއްވާ މީހުންނަށް ހުޅުގަނޑު ކޮންޓްރޯލް ނުކުރެވިގެން އުޅެނީ، އަލިފާން ނިއްވުމަށް ބިމުއަޑީގައި ގާއިމުކޮށްފައި އޮތް ނިޒާމު އަދާހުލިވެފައި ވާތީ ކަމަށްވެސް ރިޕޯޓްތައް ބުނެ އެވެ.
އަލިފާން ނިއްވާ މީހުންނަށް އޮތް އަނެއް ގޮންޖެހުމަކީ، އެނބުރެމުން ސެނބުރެމުން ބުރުޖަހާ ގަދަފަދަ ވައިރޯޅި އެވެ. އެއްދިމާއެއްގައި ހުޅުގަނޑު ބޮޑުވެ އަދި ވައިގެ ސަބަބުން ކޮންމެވެސް އެހެން ދިމާއެއްގައި ހުޅުރޯވެ ދަނީ އަނދަމުންނެވެ.
އެމެރިކާއަށް އަލިފާން ނިއްވާ މީހުން ފޮނުވަން ތައްޔާރު ކަމަށް ވިދާޅުވެ، ޒެލެންސްކީ ވިދާޅުވީ ފޮނުވަން ޖެހޭ މީހުން މިހާރު ތިބީ މުޅިން ތައްޔާރަށް ކަމަށެވެ.
އެމެރިކާގެ ފަޔާ ފައިޓަރުންނަށް ނުވި ކަމެއް ޔުކްރޭންގެ ފަޔާ ފައިޓަރުންނަށް ކުރެވޭނެތޯ ސުވާލުކުރުމުން ޒެލެންސްކީ ވިދާޅުވީ، އެކަމުގައި ގޮންޖެހުން ބޮޑު ނަމަވެސް ޔުކްރޭން އޮތީ ތައްޔާރަށް ކަމަށެވެ.