ރާއްޖޭގެ ބޮޑު ސަރަހައްދަކަށް މޫސުން ގޯސްވެފައިވާތީ ވެރިރަށް މާލެއަށް ބޯކޮށް ވާރޭވެހި ލިބިދާނެ ގެއްލުންތައް ކުޑަކުރުމުގެ ގޮތުން މާލޭގެ އެކި ތަންތަނުގައި 3،500 އަށް ވުރެ ގިނަ ވެލި ބަސްތާ ޖަހައިފި އެވެ.
މާލެ ސިޓީ ކައުންސިލުން ބުނީ މާލޭގައި ފެންބޮޑުވެދާނެ ކަމަށް ލަފާކުރެވޭ ތަންތަނުގައި ވެލިބަސްތާ ޖެހުމުގެ މަސައްކަތް ރެއިން ފެށިގެން ކުރިއަށްދާ ކަމަށެވެ. އަދި ފާއިތުވެދިޔަ ދެ ދުވަސްތެރޭ މާލޭގެ އެކި ސަރަހައްދުތަކުގައި ޖުމްލަ 3،500 އަށް ވުރެ ގިނަ ވެލިބަސްތާ ޖަހާފައިވާ ކަމަށްވެސް ބުންޏެވެ.
އެމްއެންޑީއެފުންވެސް ބުނީ މިއަދު ހަވީރު 4:15 އާ ހަމައަށް، 83 ގޭބީސީއެއްގައި 629 ވެލިބަސްތާ ޖަހައިދީފައިވާ ކަމަށެވެ.
ވިއްސާރައިގައި ލިބޭ ގެއްލުން ކުޑަކުރުމަށް ރައީސުލްޖުމްހޫރިއްޔާ ވަނީ ސަރުކާރުގެ ކަމާ ގުޅޭ އިދާރާތައް ހިމަނައިގެން ހާއްސަ ޓާކްފޯހެއް އުފައްދަވާފަ އެވެ.
ޓާސްކްފޯސްގައި ހިމެނެނީ ފުލުހުންނާއި ސިފައިންނާއި އެންޑީއެމްއޭ އެވެ.