ދިވެހިރާއްޖޭގެ އެންމެ ބޮޑު ގޭމިންގް ޕްލެޓްފޯމް -- ދިރާގު ގޭމާސް ގިލްޑް (ޑީޖީޖީ) ގެ ސީސަން 1 ލޯންޗްކޮށް "ދިރާގު މޯލްޑިވްސް ގޭމިންގް ކޮންކުއެސްޓް (ޑީއެމްޖީސީ) 2025" އިއުލާނުކޮށް ވާދަވެރި ގޭމިންގެ މުޅިން އާ މުބާރާތްތަކެއް ތައާރަފްކޮށްފި އެވެ.
މި ޗެމްޕިއަންޝިޕް ފަރުމާކޮށްފައިވާ ފޯ-ގޭމް ފޯމްޓްގެ އެހީގައި ރާއްޖޭގެ އެކި ކަންކޮޅުތަކުގައި ތިބި ގޭމިންގްއަށް ޝައުގުވެރިވާ ފަރާތްތައް އެއް ތަނަކަށް ގެނެސް އެ ކުޅުންތެރިންގެ ތަފާތު ހުނަރުތައް ދައްކާލުމަށް ފުރުސަތު ލިބިގެންދާނެ ކަމަށް ދިރާގުން ބުނެފައިވެ އެވެ.
މި ޗެމްޕިއަންޝިޕް އިންތިޒާމުކުރުމުން ރާއްޖޭގައި ތިބި ގޭމް ކުޅުންތެރިންނަށް އާ ތަޖުރިބާތަކެއް ހޯދައިދީ އެ ފަރާތްތަކުގެ ހުނަރު އިތުރުކޮށް ގޭމިންގް ކޮމިއުނިޓީ ކުރިއެރުވުމަށް ޑީޖީޖީ އިން ކުރަމުންދާ ބުރަ މަސައްކަތް ފާހަގަވެގެންދެ އެވެ.
މި ގޮތުން މި ކޮމިއުނިޓީގައި މިއަދާ ހަމައަށް 4،000 މެންބަރުން ވަނީ ރަޖިސްޓްރީކޮށްފައިވާއިރު މި ފަރާތްތަކަށް ހާއްސަކޮށްގެން ޑީޖީޖީއިން ވަނީ ވާދަވެރި އަދި ކާމިޔާބު ގިނަ މުބާރާތްތަކެއް ހިންގައި ރާއްޖޭގެ ވާދަވެރި ގޭމިންގް ކުރިއެރުވުމަށް އެންމެ ކުރީސަފުގައި ހަރަކާތްތެރިވަމުންނެވެ.
މި އަހަރުގެ ޑީއެމްޖީސީގައި "ޕަބްޖީ" އަދި "މޯބައިލް ލެޖެންޑްސް: ބޭންގ ބޭންގ" ހިމެނެ އެވެ. މީގެ އިތުރުން، މި ޗެމްޕިއަންޝިޕްގައި މި ފަހަރު މުޅިން އަލަށް "ރޮކެޓް ލީގް" އަދި "އެފްސީ 25" ވަނީ ހިމަނައިފަ އެވެ.
ދިރާގުން ބުނީ މި ޗެމްޕިއަންޝިޕްގައި ކޮންމެ ގޭމަކަށް ހާއްސަކޮށްގެން ތައްޔާރުކޮށްފައިވާ މުބާރާތްތައް ކުރިއަށްދާނެ ކަމަށެވެ.
މި ގޮތުން، "ޕަބްޖީ މޯބައިލް ކޮލިފައި"ގެ އެންމެ ގަދަ 16 ގެ ގަދަ ހިފުމެއް ފެނިގެންދާނެ ކަމަށާއި މޯބައިލް ލެޖެންޑްސްގެ ވެސް އެންމެ ގަދަ ހަތް ޓީމުގެ މެދުގައި ވާދަވެރި ފައިނަލް މެޗްތަކެއް ބޭއްވޭނެ ކަމަށް ދިރާގުން ވަނީ ބުނެފަ އެވެ. މީގެ އިތުރުން، ކުޅުންތެރިންނަށް "ރޮކެޓް ލީގު" ގެ 2v2 މެޗުތަކުގައި ބައިވެރިވުމަށް ފުރުސަތު ލިބި، އަދި އެފްސީ 25 ގައި އަމިއްލަ ތަފާތު ހުނަރުތައް ދައްކާލުމުގެ ފުރުސަތު ލިބިގެންދާނެ ކަމަށް ދިރާޣުން ބުނެފައިވެ އެވެ.
ރާއްޖޭގެ ކޮންމެ ދިމާލެއްގައި ހުރި، ކޮންމެ ފެންވަރެއްގެ ކުޅުންތެރިއަކަށް ވެސް މި ޗެމްޕިއަންޝިޕްގައި ބައިވެރިވުމުގެ ފުރުސަތު އޮތްކަން ފާހަގަކޮށް، މި މުބާރާތުގައި ބައިވެރިވުމަށް ދިރާގުން ވަނީ މަރުހަބާ ކިޔާފަ އެވެ.
ދިރާގުން ބުނި ގޮތުގައި ފޯރި ގަދަ، އަދި ތަފާތު ހަރަކާތްތަކެއް ފެނިގެންދާނެ މި ޗެމްޕިއަންޝިޕްގެ މައިގަނޑު އިވެންޓް ބޭއްވުމަށް ހަމަޖެހިފައިވަނީ މިއަހަރުގެ ޖޫން މަނު މާލޭ ސިޓީގައެވެ.
ރާއްޖޭގެ އެންމެ ބޮޑު ގޭމިން ޕްލެޓްފޯމްގެ ކަމުގައިވާ ޑީޖީޖީ އިން ދަނީ ރާއްޖޭގެ އެކި ކަންކޮޅުތަކުގައި އީ-ސްޕޯޓްސް ކުރިއެރުވުމަށް ގިނަ މަސައްކަތްތަކެއް ކޮށް، އަންނަން އޮތް ޖީލުތަކުގެ ގޭމިންގް ހުނަރުތައް އިތުރުކުރުމަށް މުހިންމު މަސައްކަތްތަކެއް ކުރަމުންނެވެ.
މި މުބާރާތަކީ ދިރާގުން ދިވެހި ގޭމިންގް އާ އުސްމިންތަކަކަށް އުފުލުމަށް ކުރަމުންދާ މަސައްކަތްތަކުން ހާސިލުކޮށްފައިވާ އިތުރު ކާމިޔާބީއެކެވެ.
މި މުބާރާތާ ބެހޭ އިތުރު މައުލޫމާތުތައް ޑީޖީޖީ ވެބްސައިޓުން ލިބޭނެ އެވެ.
