މުހިންމު ބައެއް ބޭސްތައް ނުލިބޭ މައްސަލަ ހައްލުކޮށްދިނުމަށް ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ) އާސަންދައިގައި އެދިއްޖެ އެވެ.
އާސަންދަ ކުންފުނީގެ މެނޭޖިން ޑިރެކްޓަރު އާމިނަތު ޒީނިޔާއަށް ކުޑޫ ފޮނުއްވި ސިޓީގައި ވިދާޅުވީ ޑޮކްޓަރުން ލިޔެދޭ ބޭސް އަމިއްލަ ފާމަސީތަކުން އާސަންދައިގެ ދަށުން ނުލިބޭ ކަމަށެވެ.
ބައެއް ބާވަތުގެ ބޭސް އެއްގޮތަކަށްވެސް ރާއްޖޭން ނުލިބޭ ކަމަށާއި މިއީ ދިގު މުއްދަތަކަށް ބޭސް ބޭނުންކުރާ މީހުންގެ ކަންބޮޑުވުމެއް ކަމަށް ކުޑޫގެ ސިޓީގައި ފާހަގަކޮށްފައިވެ އެވެ.
ޑޮކްޓަރުން ލިޔެދޭ ބޭހުގެ ޑޯޒޭޖު ހަމައަށް ނުލިބޭ މައްސަލަވެސް އާންމުވެފައިވާ ކަމަށް ސިޓީގައި ކުޑޫ ވިދާޅުވި އެވެ.
ހަކުރު ބައްޔާއި ކެންސަރު ފަދަ ބަލިތަކަށް ދާއިމީކޮށް ބޭނުންކުރަންޖެހޭ ބޭސްތަކަކީ އަބަދުވެސް ކަށަވަރުވާން ޖެހޭ ބޭސް ކަމަށް ކުޑޫ ވަނީ ވިދާޅުވެފަ އެވެ.
ކުޑޫގެ ސިޓީގައި ވަނީ ބޭސް ލިބުމުގައި ލޮޅުންތަކެއް އަރައިގެން އުޅެނީ ކީއްވެތޯ އަދި އެކަމަށް އަވަސް ފިޔަވަޅުތަކެއް އަޅައިދިނުމަށް އެދިފަ އެވެ.