ފިތުރު އީދު ފާހަގަކުރުމަށް މާލޭގައި މިއަދު ހަވީރު ބޭއްވި "އީދު ހަވީރު"ގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ދެކަނބަނލުން ބައިވެރިވެވަޑައިގެންފި އެވެ.
އީދު ހަވީރުގައި ހިމެނޭ ހަރަކާތްތައް އިންތިޒާމުކޮށްފައިވަނީ އެމްއެންޑީއެފް އާއި ސަރުކާރުގެ ބައެއް އިދާރާތަކާއި ސަރުކާރު ހިއްސާވާ ބައެއް ކުންފުނިތައް ގުޅިގެންނެވެ.
މިހަރަކާތްތައް ކުރިއަށް ގެންދިޔައީ ސަލްޓަން ޕާކާއި، އިސްލާމީ މަރުކަޒުގެ މައިދާނާއި ޖުމްހޫރީ މައިދާނުގެ އިތުރުން ރަސްމީ ބޮޑު ފާލަން ހިމެނޭ ސަރަހައްދުގައެވެ.
މި ހަރަކާތްތަކުގައި ބައިވެރިވެވަޑައިގަތުމަށް ރައީސްގެ ދެކަނބަލުން ވަޑައިގަތުމުން އިސްތިގުބާލް ކުރުމުގެ ގޮތުން ވަނީ ސަންގު ފުމެފަ އެވެ.
އޭގެފަހުން ރައީސްގެ ދެކަނބަލުން ވަނީ ކުޅިވަރުތައް އިންތިޒާމުކޮށްފައި ހުރި އެކި ސްޓޯލްތަކަށް ޒިޔާރާތްކުރައްވައި ބައެއް ކުޅިވަރުތަކުގައި އަމަލީގޮތުން ބައިވެރިވެވަޑައިގެންފަ އެވެ.
އީދު ހަވީރުގެ ހަރަކާތްތަކުގެ ތެރެއިން ރައީސްގެ ދެކަނބަލުން ވަނީ ގިނަ އަދަދެއްގެ ބަޔަކާ ބައްދަލުކުރައްވައި ސަލާމުކުރެއްވުމާ އެކު ފޮޓޯވެސް ނަންގަވާފަ އެވެ.
އީދު ހަވީރުގައި ހިމެނޭ ހަރަކާތްތައް ކުރިއަށް ދިޔައީ މިއަދު ހަވީރު 4:00 އިން އިރުއޮއްސި 6:00 އަށެވެ.
