މޫސުމަށް އަންނަ ބަދަލުތައް ކުޑަކުރުމަށް މިދިޔަ އަހަރު ޕެރިހުގައި ބޭއްވި "ކޮޕް 21″ގައި އެކުލަވާލައިފައިވާ "ޕެރިސް އެގްރީމެންޓް" ގައި ސޮއި ކުރެއްވުމަށް އެންވަޔަރަމަންޓް މިނިސްޓަރު ތޯރިގު އިބްރާހިމް އެމެރިކާގެ ނިއުޔޯކް އަށް ފުރާ ވަޑައިގެންފި އެވެ.
އެމެރިކާ އަށް ފުރާވަޑައިގެންނެވުމަށް ހުޅުލެ އެއާޕޯޓަށް ވަޑައިގެން ނޫސްވެރިންނަށް މައުލޫމާތު ދެއްވަމުން މިނިސްޓަރު ތޯރިގު ވިދާޅުވީ، ނިއުޔޯކުގައި މާދަމާ ބާއްވާ އެ ބައްދަލުވުމުގައި ދުނިޔޭގެ ގިނަ ގައުމުތަކުން ބައިވެރިވާނެ ކަމަށެވެ. އެ އެއްބަސްވުމުގައި 100 އެއްހާ ގައުމުން ސޮއިކުރަން ހަމަޖެހިފައިވާ ކަމަށެވެ.
އެއްބަސްވުމުގައި ސޮއިކުރުން އޮންނާނީ މިމަހުގެ 22 ވަނަ ދުވަހު އެވެ. އެއްބަސްވުމުގައި ރާއްޖެ އިން ސޮއި ކުރުމަށް ރައްޔިތުންގެ މަޖިލީހުން ވެސް ވަނީ ފާސްކޮށްފައެވެ. ރާއްޖެއަކީ އެ އެއްބަސްވުން ތަސްދީގު ކުރާ އެންމެ ފުރަތަމަ އެއް ގައުމެވެ.
މިނިސްޓަރު ވިދާޅުވީ ދުނިޔެ ހޫނުވުމާއި ގުޅިގެން މޫސުމަށް އަންނަ ބަދަލުތައް ކުޑަކުރަން މަސައްކަތްކުރުމަށް އެކުލަވާލާފައިވާ އެ އެއްބަސްވުން ތަންފީޒުކުރުމަށް މަދުވެގެން 55 ގައުމެއްގެ ބައިވެރިވުމާއި، ދުނިޔެއިން ޖައްވަށް ބޭރުކުރާ ގްރީންހައުސް ގޭހުގެ 55 އިންސައްތަ މަދުކުރަން މަސައްކަތްކުރެވޭ މިންވަރަށް އެއްބަސްވުމުގައި ބައިވެރިން ހިމެނެން ޖެހޭ ކަމަށެވެ. އެކަމަށް އެއްބާރުލުން ދިނުމުގެ ގޮތުން ރާއްޖެއިން ވަނީ، އެއްވެސް ޝަރުތަކާނުލާ ރާއްޖެއިން ބޭރުކުރާ ގްރީންހައުސް ގޭހުގެ މިންވަރު 10 އިންސައްތަ ދަށްކުރުމަށް ހުށަހަޅާފައެވެ. އަދި އިތުރު އެހީއާއެކު، 24 އިންސައްތަ އަށް އެ އަދަދު ދަށް ކުރުމަށް ވެސް ވަނީ ހުށަހަޅާފައެވެ.
ކޮޕް 21 އެގްރީމެންޓްގައި 2020 ވަނަ އަހަރާއި ހަމަޔަށް ދުނިޔެ ހޫނުވާން މެދުވެރިވާ ސަބަބުތައް ކުޑަކުރުމަށް މަސައްކަތް ކުރުމުގެ އިތުރަށް ކުދި ގައުމުތަކުގެ މޫސުމަށް އަންނަ ބަދަލު ކުޑަ ކުރުމަށް ބޭނުންވާ މާލީ އެހީ ފޯރުކޮށްދިނުމާއި ތަރައްގީވެފައިވާ ގައުމުތަކުން ކުދި ގައުމުތަކަށް ފަންނީ އެހީތެރިކަން ފޯރުކޮށްދިނުމާ ބެހޭ މާއްދާތައް ހިމަނާފައިވެ އެވެ.
އާޕޯޓުގައި މިނިސްޓަރު ތޯރިގް ނޫސްވެރިންނާއި ބައްދަލުކުރައްވަނީ -- އޯޝަން ޕްލާސްޓިކް މަދުކުރަން މަސައްކަތް ވަނީ ފެށިފަ