މި ސަރަހައްދުގެ ގައުމުތަކުގެ ގާނޫނުއަސާސީތަކާ އަޅާކިޔާލާއިރު ރާއްޖޭގައި މިއޮތީ ރައްޔިތުންގެ ހައްގުތަކަށާއި މުއައްސަސާގެ އުސޫލުތައް އެންމެ ރަނގަޅަށް ކަނޑައަޅައި އެކަމަށް ބާރުއަޅާފައިވާ ގާނޫން އަސާސީ ކަމަށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމް ވިދާޅުވެއްޖެ އެވެ.
ދ. މީދޫ ބިން ހިއްކުމުގެ މަޝްރޫއުގެ ނިންމުން ޝަރަފުވެރިކޮށްދެއްވައި މިއަދު ހެނދުނު ވާހަކަފުޅު ދައްކަވަމުން ރައީސް ޔާމީން ވިދާޅުވީ ރާއްޖޭގައި މިހާރު އަމަލު ކުރާ އަންނަ ގާނޫނުއަސާސީގައި ހައްގުތައް ހަނި ކުރެވޭނީ، އެއްވަނަ ދުނިޔޭގެ ގައުމުތަކުގައި ނޫނީ ދުނިޔޭގެ ވަރުގަދަ ޑިމޮކްރެޓިކް ނިޒާމްތަކުގައި ހައްގުތައް ހާނިކުރެވޭ މިންވަރަށް ކަމަށާއި އެ ނޫން ހުރިހާ ހައްގުތަކެއް ރައްޔިތުންނަށް މިހާރުވެސް ލިބެމުންދާ ކަމަށެވެ. އަދި ދެ ފަރާތެއްގެ ދެމެދުޖެހޭ މައްސަލަތަކުގައި ދެ ފަރާތައް ލިބެންޖެހޭ ހައްގުތަކަށް އަރައިގަންނަނީ ކޮންބަޔަކަށްތޯ ބަލައި ގޮތެއް ކަނޑައަޅައިފައި އޮތުމަކީ ޑިމޮކްރަސީގެ ބޮޑު އަސާސެއް ކަމަށެވެ.
ރައީސް ވިދާޅުވީ ރާއްޖޭގެ ގާނޫނުގެ ނިޒާމް ގަބޫލުކޮށްގެން އިދިކޮޅު ފަރާތްތަކުންވެސް މީގެ ކުރިން ވެރިކަންކޮށްފައި އޮތް ކަމަށާއި އެ ނިޒާމަކީ ރަނގަޅު އަދި ވަރުގަދަ ޖިހާދެއް ކުރެވިގެން ގެނެވުނު ނިޒާމެއް ކަމަށް އިދިކޮޅު ފަރާތްތަކުން ކުރިން އަޑުހަރުކޮށް ބުނަމުން އައި ކަމަށެވެ.
"ހަގީގަތުގައި އަޅުގަނޑުމެންގެ ގާނޫން އަސާސީ ދިރާސާ ކުރައްވާ ބޭރުގެ މުޝީރުން ވެސް ވިދާޅުވަނީ މި ސަރަހައްދުގެ ގާނޫނު އަސާސީތަކަށް ބަލާކަމަށް ވަންޏާ ރައްޔިތުންގެ ހައްގުތަކާއި މުވައްސަސާގެ އުސޫލުތަކާއި އިންފާރުތައް އެންމެ ރަނގަޅަށް އެކަށައަޅައިފަ އޮންނަ އަދި ގާނޫނުގެ މައްޗައް ރިޔާއަތްކޮށްގެން ކަންކަން ކުރުމަށް އެންމެ ބާރުއަޅައި ގާނޫނު އަސާސީއެއް މިވަގުތު ރާއްޖޭގައޭ މި އޮތީ،" ރައީސް ވިދާޅުވި އެވެ.
ރައީސް ވިދާޅުވީ މިހާރަކަށް އައިސް ދިމާވާ މައްސަލައަކީ ބަޔަކު ބޭނުން ނުވާ ގޮތަށް ގައުމުގެ ކަންކަން ދާނަމަ ގާނޫން އަސާސީ އޮންނާނީ ޅަފަތުގައި ކަމަށާއި ނަމަވެސް އެބަޔަކު ބޭނުންވާ ގޮތަށް ކަންކަން ދާނަމަ އެމީހުނަށް ގާނޫނުއަސާސީ އޮންނަނީ ދޮންވެ ފައްކާ ވެފައި ކަމަށެވެ. އަދި ވިދާޅުވީ ޑިމޮކްރަސީ އަކީ މިނިވަންކަން އެންމެ ގަދައަށް ކަށަަވަރުކޮށްދޭ އެއް ނިޒާމަކަށް ވާއިރު އެ މިިނިވަންކަން ކަށަވަރުކޮށްދެނީ ގާނޫން އަސާސީން ކަމަށެވެ. އަދި ގާނޫނުގެ އިންސާފުވެރިކަމަކީ އެންމެނަށް އެއް ހަމަޔަށް ގެންދެވޭ ނަމަ މިނިވަން ކަމުގެ ބާރު ހިފެހެއްޓޭނެ ކަމަށް ކަމަށް ވެސް ރައީސް ވިދާޅުވި އެވެ.
މީދޫގައި ރައީސް ވާހަކަފުޅު ދައްކަވަނީ ---