ގދ. ގައްދޫގައި ނުވަސަތޭކަ މީހުންގެ ޖާގައިގެ މިސްކިތެއް އަޅަން އަމީން ކޮންސްޓްރަކްޝަންއާއި މިއަދު ހަވާލުކޮށްފި އެވެ.
ނުވަ މިލިއަން ރުފިޔާގެ އެ މަޝްރޫއުގެ އެއްބަސްވުމުގައި ސޮއިކުރުމަށް މިއަދު އިސްލާމިކް މިނިސްޓްރީގައި ބޭއްވި ރަސްމިއްޔާތެއްގައި މިނިސްޓްރީގެ ފަރާތުން ސޮއިކުރެއްވީ މިނިސްޓަރު ޑރ. އަހުމަދު ޒިޔާދު ބާގިރެވެ. އަމީން ކޮންސްޓްރަކްޝަންގެ ފަރާތުން މެނޭޖިން ޑިރެކްޓަ އަބްދުﷲ މުހައްމަދެވެ.
މިއަދު ސޮއިކުރި އެއްބަސްވުމުގެ ދަށުން ކުރިއަށް އޮތް އަހަރެއްހައި ދުވަހުގެ ތެރޭގައި މިސްކިތް ބިނާކޮށް ނިންމަންޖެހެ އެވެ. އެ މަޝްރޫއު ގައްދޫގައި ކުރިއަށް ގެންދާ އަމީން ކޮންސްޓްރަކްޝަނުން ބުނީ އެއްބަސްވުމުގައިވާ މުއްދަތަށް މިސްކިތް ނިންމާލެވޭނެ ކަމަށެވެ.
މިނިސްޓަރު ޑރ. އަހުމަދު ޒިޔާދު ވިދާޅުވީ، ގައްދޫގައި ބޮޑު މިސްކިތެއް ބިނާކުރުމުގެ މަސައްކަތަކީ އެ ދާއިރާގެ މެންބަރު އަހުމަދު ރަޝީދުގެ ވަރަށް ބުރަ މަސައްކަތުގެ ނަތީޖާ ކަމަށެވެ. މި މިސްކިތަކީ ގައްދޫގެ އެތައް ބައެއްގެ ހުވަފެންތަކާއި ގުޅިގައިވާ މިސްކިތެއް ކަމުން މިއީ އެރަށުގެ ރައްޔިތުންނަށް ލިބިގެންދާނެ ވަރަށް ބޮޑު އުފަލަކަށް ވާނެ ކަމަށެވެ.
މިއަދުގެ ރަސްމިއްޔާތުގައި ގައްދޫ ދާއިރާގެ މެންބަރު އަހުމަދު ރަޝީދުވެސް ބައިވެރިވެވަޑައިގެންނެވި އެވެ.
ގައްދޫގައި މިސްކިތެއް އަޅަން އަމީން ކޮންސްޓްރަކްޝަން އާ ހަވާލުކުރުމަށް ބޭއްވި ރަސްމިއްޔާތުގެ ތެރެއިން -- އަވަސް ފޮޓޯ އާމިނަތު އިބްރާހިމް