ބުރިޖް މަސައްކަތުގައި އުޅުނު ބަޔަކަށް އަނިޔާވެއްޖެ

ހުޅުލެ-މާލެއާ ދެމެދު އަޅާ ޗައިނާ - މޯލްޑިވްސް ފްރެންޑްޝިޕް ބުރިޖްގެ މަސައްކަތުގައި ބޭނުން ކުރި ޑިންގީއެއް ބަންޑުން ޖަހާލައި އެ ޑިންގީގައި ތިބި ބަޔަކަށް އެކިވަރުގެ އަނިޔާވެއްޖެ އެވެ. އޭގެ ތެރެއިން އެކަކަށް ވަނީ ސީރިއަސް އަނިޔާތަކެއްވެފަ އެވެ.

އަނިޔާވި މީހުންގެ ތެރެއިން އެކަކު ގެންދިޔައީ އައިޖީއެމްއެޗަށެވެ. އަނެކަކު ގެންގޮސްފައި ވަނީ އޭޑީކޭ އަށެވެ.

އައިޖީއެމްއެޗްގެ މީޑިއާ ކޯޑިނޭޓަރު ވިދާޅުވީ ބްރިޖް ސައިޓްގައި މަސައްކަތް ކުރަން އުޅެނިކޮށް އަނިޔާވެގެން އެ ހޮސްޕިޓަލަށް ގެނައީ ދިވެއްސެއް ކަމަށާއި އޭނާގެ ބޮލަށް އެކިވަރުގެ އަނިޔާ ލިބިފައިވާ ކަމަށެވެ. އެހެން ނަމަވެސް ހާލު ސްޓޭބަލް ކަމަށް އޭނާ ވިދާޅުވި އެވެ. ބެލެވޭ ގޮތުގައި އެ މީހާ އަކީ ޑިންގީ ދުއްވަން ހުރި މީހާ އެވެ.

"އިތުރު ޕޭޝަންޓަކު ވެސް މިކޮޅަށް ޓްރާންސްފާ ކުރާ ވާހަކަ ވެސް އެބަ ދެކެވޭ،" މީޑިއާ ކޯޑިނޭޓަރު ވިދާޅުވި އެވެ.

އަނެއް މީހާއަށް ފަރުވާ ދެނީ އޭޑީކޭގަ އެވެ. އެއީ ޗައިނާ މީހެއް ކަމަށްވެ އެވެ. ހާލު ސީރިއަސްއީ އެ މީހާ އެވެ.

މިއަދު ހެނދުނު 11:00 އެހާކަން ހާއިރު، ބްރިޖް ސައިޓްގައި އެ އެ އެކްސިޑެންޓް ހިނގީ ދެ މަސައްކަތު މީހަކު ޑިންގީގައި ރާޅުގަނޑު ސަރަހައްދަށް ފައިބައިގެން އުޅެނިކޮށް ނެގި ރާޅެއްގައި ޖެހި ޑިންގީ ބަންޑުން ޖަހާލައިގެންނެވެ. އެ މީހުން ޑިންގީގައި އެ ސަރަހައްދުގައި އުޅުނީ، އެތަނުގައި ހަދާފައިވާ ވަގުތީ ފާލަމުގެ މަސައްކަތްތަކެއް ކުރުމަށެވެ.

ސީރިއަސް އަނިޔާތަކެއް ލިބުނު މީހާއަށް އަނިޔާވީ ޑިންގީ ބަންޑުން ޖަހާލި ވަގުތު ގެނބިގެން ގޮސް އެ ސަރަހައްދުގައި ހުރި ގާތަކެއްގައި އޭނާގެ ބޯ ޖެހިގެންނެވެ. މަންޒަރު ދުށް މީހުން ބުނީ، އޭނާ މޫދުން ނެގި އިރު ބޮލަށް ބޮޑެތި ޒަހަމްތަކެއް ލިބިފައި ހުރި ކަމަށެވެ. އަދި އެ މީހާގެ ހޭ ވެސް ނެތް ކަމަށް އެ ސަރަހައްދުގައި ތިބި މީހުން ބުންޏެވެ. އެ ހާދިސާ ހިނގުމާ އެކު ބްރިޖް ސައިޓްގައި މަސައްކަތް ކުރަން އުޅުނު ގިނަ ބަޔަކު އަދި އާންމުން ވެސް ސަރަހައްދަށް އެއްވި އެވެ.

ފުލުހުން ބުނީ، ރާޅުގަނޑުގައި ޑިންގީއެއް ބަނޑުން ޖަހާލިކަމުގެ ރިޕޯޓް މިއަދު ހެނދުނު 10:50 ހާއިރު ލިބިފައިވާ ކަމަށެވެ. އަދި އެ ސީންއަށް ފުލުހުން އެޓެންޑް ވަމުން އަންނަ ކަމަށް ވެސް ބުންޏެވެ. އިތުރު ތަފްސީލެއް އަދި ނުލިބެ އެވެ.