މުއައްސަސާތަކަށް ބޭނުންވާ ސޮފްޓްވެއާ ލައިސަންސް ފަސޭހަކަމާއެކު ހެޔޮ އަގުގައި ހޯދުމަށް ދުނިޔޭގެ މަޝްހޫރު ކޮމްޕިއުޓާ ސޮފްޓްވެއާ ކުންފުނި، މައިކްރޮސޮފްޓާއެކު ނޭޝަނަލް ސެންޓާ ފޯ އިންފޮމޭޝަން ޓެކްނޮލޮޖީ (އެންސީއައިޓީ) އިން އެއްބަސްވުމެއްގައި ސޮއިކޮށްފި އެވެ.
އިންފޮމޭޝަން ޓެކްނޮލޮޖީގެ ތަސައްވުރުތަކާ އެއްގޮތަށް ކުރިއަށް އޮތް ފަސް އަހަރަށް ކަނޑައަޅާފައިވާ ލަނޑުދަނޑިތައް ހާސިލްކުރުމަށް މިއަދު ސޮއިކުރި އެ އެއްބަސްވުމުގެ ދަށުން ސޮފްޓްވެއާ ރާއްޖެއަށް އަގުހެޔޮށް ހޯދުމާއި ދައުލަތުގެ އިންފޮމޭޝަން ޓެކްނޮލޮޖީ ވިއުގައާ ގުޅިފައިވާ ކޮމްޕއިޓިން އެންވަޔަރަމަންޓް އައި އެސް އޯ މިންގަނޑަށް ފަރުމާކޮށް ސައިޓްކުރެވޭނެ އެވެ. މީގެ އިތުރުންވެސް ތައުލީމީ ދާއިރާއަށް ބޭނުންވާ ސޮފްޓްވެއާތައް ހިލޭ ބެހުމާއި ހާއްސަ ސެންޓަރެއް ގާއިމްކޮށް، އިންފޮމޭޝަން ޓެކްނޮލޮޖީގެ ދާއިރާއިން މީހުން ތަމްރީންކުރުން ވެސް ހިމެނެ އެވެ.
ކުރުނބާ މޯލްޑިވްސްގައި މިއަދު ބޭއްވި ރަސްމިއްޔާތެއްގައި އެންސީއައިޓީ އާއި މައިކްރޮސޮފްޓާއި މެކްސްކޮމް ކޮމިއުނިކޭޝަން ޓެކްނޮލޮޖީން ސޮއިކުރި އެ އެއްބަސްވުމުގައި އެންސީއައިޓީން ސޮއިކުރެއްވީ އެ ތަން ހިންގުމާ ހަވާލުވެ ހުންނެވި ފިނޭންސް މިނިސްޓްރީގެ ސްޓޭޓް މިނިސްޓަރު މުހައްމަދު އަޝްމަލީ އެވެ. މައިކްރޮސޮފްޓުން، ސްރީލަންކާގައި ހުންނަ އެ ކުންފުނީގެ އިސްވެރިޔާ ޕީޖިތާ ރާޖަޕަކްސަ އެވެ. ޕްރޮޖެކްޓް ރާއްޖޭގައި ހިންގުމާ ހަވާލުކޮށްފައިވަނީ މެކްސްކޮމް އާ އެވެ.
މިއަދު ސޮއިކުރި އެއްބަސްވުމާ ގުޅިގެން ފިނޭންސް މިނިސްޓާ ފޮ ސްޓޭޓް މުހައްމަދު އަޝްމަލީ ވިދާޅުވީ، އެއްބަސްވުމުގެ ދަށުން އައިސީޓީގެ ބޭނުން ހެޔޮ ގޮތުގައި ހިފައި، ދައުލަތުގެ ހިންގުން ހަރުދަނާކޮށް، އައިއެސްއޯ ސެޓިފައިޑް ޑިޒައިނެއް ރާއްޖެ އަށް ދިނުމަށް މައިކްރޯސޮފްޓު ކުންފުނިން އެހީތެރިވެދޭނެ ކަމަށެވެ. އެގޮތުން މަރުކަޒީ ވިއުގައެއް ގާއިމްކޮށް، ދައުލަތުގެ އިދާރާތަކުގައި ރައްކާކޮށްފައިވާ އިލެކްޓްރޯނިކް މައުލޫމާތު ރައްކާޓެރިކަމާއެކު ބަލަހައްޓާނެ ނިޒާމެއް ވެސް ގާއިމްވެގެންދާނެ ކަމަށެވެ.
" މި އެއްބަސްވުމުގެ ސަބަބުން މައިކްރޮސޮފްޓް އޮފީސް ސޮފްޓްވެއާގެ ލައިސަންސް ހާއްސަ އަގުތަކެއްގައި ލުއިފަސޭހަކަމާއެކު ލިބުމުގެ މަގުފަހިވެ، އޮފީސްތަކުގެ ކޮމްޕިއުޓާ ވިއުގަ ބަލަހައްޓާ މުވައްޒަފުންގެ ތެރެއިން 3000 އަށް ވުރެ ގިނަ މުވައްޒަފުން ތަމްރީނު ކުރެވިގެންދާނެ،" އަޝްމަލީ ވިދާޅުވި އެވެ.
ސަރުކާރުގެ އޮފީސްތަކުގައި މިހާރުވެސް މައިކްރޮސޮފްޓް އޮފީސް ޕެކޭޖާއި ވީޑިއޯ ކޮންފަރެންސް އިން ސްކައިޕާއި ވިންޑޯސް ޑައިނަމިކްސް އާއި އެންޓި ވައިރަސް ފަދަ ޕްރޮޑަކްޓްސްތައް ބޭނުން ކުރާއިރު މި އެއްބަސްވުމާއެކު މައިކްރޮސޮފްޓްގެ ސޮފްޓްވެއާތަކަށް ފަސޭހައިން ވަދެވި، މައިކްރޯސޮފްޓްގެ އިތުރު ވާޝަންއެއް ނެރުނަސް ވަރަށް ކުޑަ އަގެއްގައި ސޮފްޓްވެއާ އަޕްގްރޭޑް ކުރުމާއި ޑައުންގްރޭޑް ކުރުމުގެ ހިދުމަތްތައް ލިބޭނެ އެވެ.
އަޝްމަލީ ވިދާޅުވި ގޮތުގައި ހުރިހާ އޮފީހެއް އެއްކޮށްލައިގެން މައިކްރޮސޮފްޓް ޕްރޮޖެކްޓްތައް ގަތުމަށް އަހަރަކު 20 މިލިއަން ރުފިޔާ ހަރަދުވާނެ ކަމަށް ލަފާކޮށްފައިވާއިރު، އެއްބަސްވުމާއެކު ކުންފުނީގެ ޕްރޮޑަކްޓްތަކަށް 18 މިލިއަން ރުފިޔާ ހަރަދުވާނެ ކަމަށް ލަފާކުރެވޭ ކަމަށް އަޝްމަލީ ވިދާޅުވި އެވެ.
ސޮފްޓްވެއާ ލައިސެންސް ހޯދުމަށް މައިކްރޮސޮފްޓާއެކު ސީދާ އެއްބަސްވުމެއްގައި ސަރުކާރުން މިއަދު ފުރަތަމަ ފަހަރަށް ސޮއިކޮށްފައިވާއިރު މީގެ ކުރިން ދައުލަތުން ލައިސަންސްތައް ނަގަމުން ދަނީ ވަކިވަކި އޮފީސްތައް މެދުވެރިކޮށް އެކި އަގުތަކުގަ އެވެ. ނަމަވެސް މި އެއްބަސްވުމާއެކު ހިފެހެއްޓިފައި ހުންނަ އަގުތަކެއްގައި ލައިސަންސް ލިބިގެންދާނެ އެވެ.