ދެކުނު އޭޝިއާގެ ޖޫނިއާ ޓީޓީ ޗެމްޕިއަންޝިޕްގައި ރިހި މެޑަލް ހޯދި ޒުވާން ޓީމުގެ އަމާޒަކީ މިފަދަ މުބާރާތަކުން ރަންމެޑަލް ހާސްިލް ކުރުމް ކަމަށް ބުނެފި އެވެ.
މިއަދު މާލެ އައި ޓީމު ވަނީ މި ފަހަރުގެ މުބާރާތުގެ ޓީމު އިވެންޓުން ރިހި މެޑަލް އަދި ލޯ މެޑަލް ހޯދާފައެވެ. އަދި ޑަބަލްސް އިވެންޓުންވެސް ވަނީ ރިހި މެޑަލް ހޯދާފައެވެ.
ޓީޓީ އެސޯސިއޭޝަންގެ ޖެނަރަލް ސެކެޓްރީ މުހައްމަދު ސުޖާއު އަވަސް އަށް ވިދާޅުވީ މިއީ ފެށުމެއް ކަމަށާއި ވަރަށް ޒުވާން ކުޅުންތެރިންތަކެއް މެޑަލް ހޯދުމަކީ ޓީޓީގެ ކުރިމަގު ވަރަށް އުޖާލާވާނެ ކަމުގެ ހެއްކެއް ކަމަށެވެ.
މުބާރާތުގައި ރިހި މެޑަލް ހޯދި ޓީމުގެ ރަފާ ނާޒިމްއާއި ލައިސާ ފަތުހުﷲގެ އުމުރަކީ 13 އަހަރެވެ. މިއީ މުބާރާތުގައި ވާދަ ކުރި އެންމެ ޒުވާން ޓީމެވެ. ސީނިއާ ޓީމުގައިވެސް ހިމެނޭ ދެ ކުޅުންތެރިން ވަނީ އުމުރުން ދޮށީ ކުޅުންތެރިންނާ ދެކޮޅަށް ކުޅެ ރަނގަޅު ފައިޓެއް ދީފައެވެ.
"މީ ވަރަށް ވާދަވެރި މެޗްތަކެއް. ނަމަވެސް ފުލުފުލުގައި މެޗްތަކެއް ކުޅެން ޖެހުމުންވެސް މި ކުޅުންތެރިންގެ ޕާފޯމަންސް އެއްވަރެއްގައި ހިފެހެއްޓުމަކީ ލިބުނު ވަރަށް ބޮޑު ހިތްހަމެޖުހުމެއް. ދެން އޮތް ފިޔަވަޅަކީ ސަރަހައްދީ މުބާރާތުން ރަން މެޑަލް ހޯދުން. ހަމައެޔައެކު މިހާރުން ފެށިގެން ސަރަހައްދުން ބޭރަށް އެޝިއާގެ އެހެން މުބަރަތްތަކުގައިވެސް ކަމިޔަބު ހޯދުމަށް އަޅުގަނޑުމެން ބުރަ މަސައްކަތް ކުރާނަން" ސުޖާ ވިދާޅުވިއެވެ.