ވެރިރަށް މާލެއަށާއި ރާއްޖެއިން ބޭރަށް ހިޖުރަކުރުމުގެ ސަބަބުން، އަތޮޅުތަކާއި މާލެއިން ދިރުއުޅުމަށް އަޅާފައިވާ، 12،700 އަށް ވުރެ ގިނަ ގެ ފަޅުވެ، ވީރާނާވަމުންދާ ކަމަށް 2014 ވަނަ އަހަރުގެ ބޯހިމެނުމުގެ ރަސްމީ ރިޕޯޓުން ހާމަވާއްޖެ އެވެ.
ރިޕޯޓްގައި ފާހަގަ ކުރާ ގޮތުން މާލެއަށް ހިޖުރަ ކުރާ މީހުން އަހަރަކުން އަހަރަކުން އަންނަނީ އިތުރުވަމިންނެވެ.
އަށް އަހަރުގެ މެދުކެނޑުމަކަށްފަހު 2014 ވަނަ އަހަރު ނެޝަނަލް ބިއުރޯ އޮފް ސްޓްޓިސްޓިކްސް (އެންބީއެސް) އިން މުޅި ރާއްޖޭގައި ކުރިއަށް ގެންދިޔަ ބޯހިމެނުމުގެ ތަފްސީލް ރިޕޯޓުގައި ބުނެފައިވަނީ، ދިރިއުޅުމުގެ ބޭނުމަށް އަތޮޅުތަކުގެ އެކި ރަށްރަށުގައި ހަދާފައިހުރި 6،848 ގެ ހިޖުރަ ކުރުމުގެ ސަބަބުން، ހާއްސަކޮށް ވެރިރަށް މާލެއަށް ދިރިއުޅުން ބަދަލުކުރުމުގެ ސަބަބުން ފަޅުވެފައިވާ ކަމަށެވެ. މިއީ އަތޮޅުތަކުގެ ރަށްރަށުގައި މީހުން ދިރިއުޅެން ބިނާކޮށްފައިވާ ޖުމްލަ އަދަދުގެ 22 ޕަސެންޓެވެ.
މާލެއަށް ބަލާއިރު 2014 ވަނަ އަހަރާ ހަމަޔަށް ފަޅުވެފައިވާ ގެތަކުގެ ނިސްބަތް އުޅެނީ 5,872 ގަ އެވެ. މިއީ މާލޭގައި މީހުން ދިރިއުޅުމަށް ބިނާކުރި އިމާރާތްތަކުގެ ހަ ޕަސެންޓެވެ.
އެންބީއެސްގެ ރިޕޯޓުގައި ބުނެފައިވަނީ، ފަޅު ގެތަކުގެ ގޮތުގައި ބަލާފައިވަނީ މީހުން އެތަނެއްގައި ދިރިއުޅުކަން ސާބިތުވާ ތަންތަން ކަމަށެވެ. އިމާރާތްކޮށް ނުނިމި ހުރި ގޯތިތައް އެ، ރިޕޯޓްގައި ހިމަނާފައިވަނީ ނިދުން ފަދަ ބޭނުންތަކަށް އެތަންތަން ބޭނުންކޮށްފައިވާނަމަ އެވެ.
ރަށްރަށުގެ ގެތައް ފަޅުވާން ދިމާވާ އެންމެ ބޮޑު ސަބަބެއް ކަމަށް އެ އިދާރާއިން ލަފާކޮށްފައިވަނީ، ރަށްރަށުގައި ގެދޮރުވެރިކަމުގެ މާކެޓް ދަށްވުން ނުވަތަ ރަށްރަށުގައި ވަޒަންވެރިވާން ޝައުގުވެރިވާ މީހުން މަދުވުމެވެ. އަދި އަމިއްލަ ރަށް ދޫކޮށް އެހެން ރަށްރަށަށް، ހާއްސަކޮށް މާލެއަށް ބަދަލުވާ މީހުންގެ ނިސްބަތް އިންތިހާއަށް އިތުރުވުމަކީ ވެސް ސަބަބެކެވެ.
ރާއްޖޭގެ އާބާދީ ހަތަރު ލައްކަ އަށްވުރެ އިތުރުވެފައިވާ އިރު އާބާދީގެ ބޮޑު ބައެއް މިހާރުވެސް ދިރިއުޅެނީ މާލޭގަ އެވެ.