އިނގިރޭސި ވިލާތުގައި ތިބި ސަރުކާރާ އިދިކޮޅު ބައެއް ފަރާތްތައް ގުޅިގެން އުފައްދާފައިވާ ޔުނައިޓެޑް އޮޕޮޒިޝަން ކޯލިޝަން (އެމްޔޫއޯ)ގެ ޝެޑޯ ކެބިނެޓަށް ނިސްބަތްވާ ބައެއް ލީޑަރުން ފުލުހަށް ހާޒިރުވާން އަންގާފައިވަނީ އެމީހުންގެ އަގު ވައްޓާލަން ކަމަށް ބުނެ އެމްޔޫއޯއިން ކަންބޮޑުވުން ފާޅުކޮށްފި އެވެ.
ޝެޑޯ ކެބިނެޓަށް ނިސްބަތްވާ ބޭފުޅުންގެ ތެރެއިން ފުލުހުންގެ އިދާރާއަށް ހާޒިރުވާން އަންގާފައިވަނީ އަދާލަތު ޕާޓީގެ ހާރިޖީ ގުޅުންތަކާބެހޭ ކޮމެޓީގެ ރައީސާ ޝިދާތާ ޝަރީފާއި ކުރީގެ މަޖިލިސް މެންބަރު ތަސްމީނު އަލީ އަދި ކުރީގެ ޔޫތް މިނިސްޓަރު ހަސަން ލަތީފް އަށެވެ. އެބޭފުޅުންނަށް ފުލުހަށް ހާޒިރުވުމަށް އަންގައި ޗިޓު ފޮނުވާފައިވާ އިރު، ހާޒިރުކުރާ ސަބަބެއް ފުލުހުން ހާމައެއް ނުކުރެ އެވެ.
އެ އެންގުން ކުށްވެރިކޮށް އިދިކޮޅު އިއްތިހާދުން ނެރުނު ބަޔާނެއްގައި ބުނީ، އެ އިއްތިހާދަށް ނިސްބަތްވާ ތިން މެންބަރުންނަށް ފުލުހުން ފޮނުވި ޗިޓުން، އެބޭފުޅުން ހާޒިރުކުރަނީ ފުލުހުން ކުރަމުންދާ ތަހުގީގަކާ ގުޅިގެން ކަން އެނގޭ ކަމަށާއި ނަމަވެސް އެއީ ކޮން ތަހުގީގަކާ ގުޅިގެންކަން އެނގެން ނެތް ކަމަށެވެ. އެހެންކަމުން ފުލުހުންގެ އެ އަމަލަކީ އިދިކޮޅު ފަރާތްތަކަށް ފުރައްސާރަކޮށް އެމީހުންގެ އަގު ވައްޓާލަން ކޮށްފައިވާ އަމަލެއް ކަމަށް ބަޔާނުގައި ބުންޏެވެ.
"އެމްޔޫއޯއިން މިކަންކަމަށް ކަންބޮޑުވޭ،" ބަޔާނުގައި ބުންޏެވެ.
ޝިދާތާއާއި ހަސަން އަދި ތަސްމީނަށް ޗިޓު ފޮނުވާފައި ވަނީ މިއަދު ހަވީރު 4:00 އަށް ފުލުހުންގެ އިދާރާއަށް ހާޒިރުވުމަށެވެ.