އިނގިރޭސި ވިލާތުގެ ލަންޑަނުގެ ރަސެލް ސްކޮއާގައި އިއްޔެ މީހަކަށް ވަޅިން ހަމަލާދީ މަރާލާފި އެވެ. އުމުރުން ދުވަސްވީ އެ މީހާއަށް ފަރުވާދެމުން ދަނިކޮށް މަރުވެފައިވާއިރު މި ހަމަލާގައި އިތުރު ފަސް މީހަކު ވެސް ވަނީ ޒަހަމްވެފަ އެވެ.
ޔުނިވާސިޓީ އޮފް ލަންޑަން އާއި ބްރިޓިޝް މިޔުޒިއަމް ކައިރީގައި އޮންނަ ރަސެލް ސްކޮއާއަކީ، ފަތުރުވެރިންގެ މެދުގައި މަގުބޫލު ސަރަހައްދެކެވެ.
އެ ހަމަލާއާ ގުޅިގެން މިހާރު 19 އަހަރުގެ ފިރިހެނަކުވަނީ ހައްޔަރުކޮށްފަ އެވެ. އެ މީހާއަކީ ސިކުނޑީގެ މައްސަލައެއް ހުންނަ މީހެއް ކަމަށް ލަފާކުރެވޭ ކަމަށް ފުލުހުން ބުނެފައިވެ އެވެ.
މި ހަމަލާގައި އިތުރަށް ޒަހަމްވެފައިވަނީ ދެ އަންހެނުންނާއި ތިން ފިރިހެނުން ކަމަށް ރިޕޯޓުތައް ބުނެ އެވެ. ފުލުހުން މިހާރު އެމައްސަލަ ތަހުގީގް ކުރަމުންދާއިރު އެއީ ޓެރަރިޒަމްގެ ހަމަލާއެއް ކަމަށް ވެދާނެތީ އެކަމަށް ސަމާލުކަން ދީފައިވާ ކަމަށް ބުނެ އެވެ.
ފުލުހުން އެ މައްސަލަ ތަހުގީގް ކުރަމުންދަނީ ކައުންޓާ ޓެރަރިޒަމް ޔުނިޓާ ގުޅިގެންނެވެ.