އިދިކޮޅު ފަރާތްތަކަށް މިއަދު ޒުވާނުންގެ ތާއިދު ގެއްލިފައިވާ ކަމަށާއި އެހެން ދިމާވާން ޖެހުނީ އިދިކޮޅު ފަރާތްތަކުން ޒުވާނުންނަށް އަޅާނުލުމުން ކަމަށް ޓުއަރިޒަމް މިނިސްޓަރު އަހުމަދު އަދީބު ވިދާޅުވެއްޖެ އެވެ.
ގާނޫނު އަސާސީގެ ހިމާޔަތުގައި ކަމަށް ބުނެ ޖޭޕީ އާއި އެމްޑީޕީން މިހާރު މާލޭގައި ކުރަމުންދާ މުޒާހަރާތަކާއި ދެކޮޅު ހަދާ ރައީސް ޔާމީނަށް އޮތް ތާއީދު ހާމަ ކުރުމުގެ ގޮތުން ގިނަ އަދަދެއްގެ ޒުވާނުން މިއަދު މާލޭގައި ބޭއްވި އަޑު އުފުލުމުގައި ވާހަކަ ދައްކަވަމުން އަދީބު ވިދާޅުވީ ޒުވާނުންނާ ދިމާލަށް "ގޭންގޭ"، "ގުންޑާ" އޭ ނުކިޔޭނެ ކަމަށެވެ. އަދި ގޭންގުތަކާއި "ގުންޑާއިން" ތިބީ އެމްޑީޕީގައި ކަމަށާއި އެކަން އެމްޑީޕީން ސާބިތު ކޮށްދީފައިވާ ކަމަށް ވެސް އަދީބު ވިދާޅުވި އެވެ.
"ޒުވާނުންތަކެއް އެއްވެސް އަޅުގަނޑުމެން ހަރަކާތެއް ބާއްވާލަން އުޅޭ އިރަށް ސޯޝަލް މީޑިއާގައި ކިޔާނެ ގޭންގޭ ގުންޑާއިން ގޮވައިގެންނޭ. އަޅުގަނޑުމެން [ޒުވާނުންނާއި] ދިމާލަށް ތިހެނެއް [ގޭންގޭ] ނުބުނެވޭނޭ. ގޭންގަކީ ވެސް އެމްޑީޕީ. އެމްޑީޕީން އެކަން ވެސް ދައްކާފައި އޮތީ،" އަދީބު ވިދާޅުވި އެވެ.
މީގެ އިތުރުން އަދީބު ވިދާޅުވީ އެމްޑީޕީއާއި ޖޭޕީން އެއްވުމަކަށް މިހާރު ގޮވާލިޔަސް އެއްވަނީ އުމުރުން 50 އަހަރަށްވުރެ މަތީ ފަންސާހަކަސް މީހުން ކަމަށެވެ. އަދި އިދިކޮޅު ފަރާތްތަކަށް ވެރިކަން ހަވާލު ކުރުމުން މީގެ ކުރިން ވެސް ކަންކުރި ގޮތަކީ އިސްތިއުފާދީ ބައިތުލްމާލު ހުސްކޮށްލީ ކަމަށް އަދީބު ވިދާޅުވި އެވެ.
އަދީބު ވިދާޅުވީ އެމްޑީޕީ ޖޭޕީން މަސައްކަތް ކުރަމުން އަންނަނީ ގައުމަށް ހެވެއް އެދިގެނެއް ނޫން ކަމަށާއި މުދާ ގެއްލެމުން ދާތީ ކަމަށެވެ. އަދި ވިދާޅުވީ އިދިކޮޅު ފަރާތްތަކަށް ގައުމަށް އިތުރަށް ކޮށްދެވޭނެ އެއްވެސް ކަމެއް ނެތް ކަމަށެވެ.
ޖުމްހޫރީ ޕާޓީގެ ލީޑަރު ގާސިމް އިބްރާހިމަށް ފާޑު ވިދާޅުވަމުން އަދީބު ވިދާޅުވީ ގާސިމް "ބޮޑާ" ވުމުން އެބޭފުޅާ "ކުއްޅަވައްފަލު ރަނިންނަށް" ވެފައިވާ ކަމަށާއި ގާސިމް އެންމެ ފުރަތަމަ މާލެ އަރާވަޑައިގެންނެވި ގޮތް ވެސް އެބެފުޅާ މިހާރު ހަނދާނެއް ނެތް ކަމަށެވެ. އަދި ވިދާޅުވީ ސަލާން ޖަހަން ޖެހުނަސް ގާސިމަށް ނުވިކޭނެ ކަމަށެވެ.
އަދީބު ވިދާޅުވީ މި ސަރުކާރު އޮތީ ޒުވަނުނަށް ދަރަންޏަށް ކޮފީ ދޭކަށް ނޫން ކަމަށާއި ސަރުކާރުން މަސައްކަތް ކުރަނީ "ގެޓް ސެޓް" ޕްރޮގްރާމްގެ ތެރެއިން ޒުވާނުން ބާރުވެރިކޮށް ޒުވާނުންނަށް ވަޒީފާ ހޯދައިދިނުމަށް ކަމަށެވެ. އަދި މި ސަރުކާރުގައި ޒުވާނުންނަށް އޮތީ ކުރިއެރުން ކަމަށް އަދީބު ވިދާޅުވި އެވެ.