އެޗްޑީސީގެ ތެރޭގައި ހިންގަމުން ދިޔަ ހިޔާނާތުގެ ބޮޑެތި މައްސަލަތައް ފާހަގަކޮށް އެ ކުންފުނީގެ ކުރީގެ ޗެއާމަން އަހްމަދު ޒުހޫރު ފޮނުއްވި ސިޓީ ލިބިވަޑައިގެންފައި ނުވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ރާއްޖޭގެ ބައެއް ނޫސްވެރިންނާ މިއަދު ބައްދަލުކުރައްވާ ރައީސް މުއިއްޒު ވިދާޅުވީ ޒުހޫރުގެ ސިޓީ ކުރިން ލިބިވަޑައިގެންނެވިނަމަ ފިޔަވަޅު އަޅުއްވާނެ ކަމަށާއި ޒުހޫރުގެ ސިޓީ ލިބިވަޑައިގެންފައި ނެތް ކަަމަށެވެ.
"ސިޓީއެއް އަޅުގަނޑަށް ލިބި، އަމަލުނުކޮށް އޮތް ކަމަށް ބުނެ ދައްކާ ވާހަކައަކީ ހަގީގީ ވާހަކައެއް ނޫން،" ރައީސް ވިދާޅުވި އެވެ.
އެމަނިކުފާނު ވިދާޅުވީ އެކި އިދާރާތަކުގެ ތެރޭގައި ގާނޫނާއި ގަވައިދާ ހިލާފަށް ހިންގާ ބައެއް ކަންކަމުގެ މައުލޫމާތު ލިބިވަޑައިގަތުމާ އެކު މީގެކުރިންވެސް ފިޔަވަޅު އަޅުއްވާފައިވާނެ ކަމަށެވެ. އަދި އެ މައްސަލައެއް ބެލުމަށް އަންގަންޖެހޭ އިދާރާތަކަށް އަންގަމުންދާ ކަމަށްވެސް ވިދާޅުވި އެވެ.
ރައީސް ވިދާޅުވީ އެޗްޑީސީގެ ތެރޭގައި ހިންގާފައި ހުރި ހިޔާނާތުގެ މައްސަލަތައް އެނގުނު ހިސާބުން އެކަމުގައިވެސް ފިޔަވަޅު އަޅުއްވާ އަދި މައްސަލަ ބެލުމަށް ފުލުހުންނަށް އެންގެވި ކަމަށެވެ.
މި ސަރުކާރަކީ ކޮރަޕްޝަނާއި ފަސާދައާ ދުރު ސަރުކާރަކަށް ހެދުމަކީ ވައުދެއް ކަމަށްވާތީ ކޮރަޕްޝަނާއި ފަސާދަ ހިންގާ ފަރާތްތަކާ ދެކޮޅަށް އަޅަންޖެހޭ ފިޔަވަޅުތައް އެޅުމުގައި ފަސްޖެހިވަޑައިނުގަންނަވާނެ ކަމުގައިވެސް ރައީސް ވިދާޅުވި އެވެ.
"އެވައުދު މަތީ ދެމިހުންނާނަން،" ރައީސް ވިދާޅުވި އެވެ.
އެމަނިކުފާނު ވިދާޅުވީ ދައުލަތުގެ އެކި މަގާމުތަކަށް ބޭފުޅުން ހަމަޖައްސަނީ ކޮރަޕްޝަނާއި ފަސާދައިގެ އަމަލުތައް ހިންގަން ނޫން ކަމަށާއި އެހެންކަމުން އެފަދަ އަމަލުތައް ހިންގާނަމަ ވަކި ބޭފުޅަކަށް ބެލުމެއް ނެތި ފިޔަވަޅު އަޅައި މަގާމުންވެސް ވަކިކުރާނެ ކަމަށެވެ.
ޒުހޫރު ފޮނުއްވި ކަމަށް ބުނާ ސިޓީ ލިބިވަޑައިނުގަންނަވާ ކަމަށް ރައީސް ވިދާޅުވިއިރު ހަތް ސަފްހާގެ އެ ސިޓީގައި ޒުހޫރު ވަނީ އިއްޔެގެ ނިޔަލަށް އެޗްޑީސީގެ ޗެއާމަންގެ މަގާމުގައި ހުންނެވި ފަޒުލް ރަޝީދު ހިންގަވަމުން ގެންދެވި ކަމަށް ބުނާ ހިޔާނާތާއި ފަސާދައިގެ އެތައް އަމަލެއް ފާހަގަކުރައްވާފަ އެވެ.
ޒުހޫރު، މިދިޔަ ޖުލައި އެއްވަނަ ދުވަހު ފޮނުއްވި ސިޓީ ސޯޝަލްމީޑިއާގައި މިހާރު އާންމުވެފައިވާތީ ބައެއް އާންމުން ބުނާ ގޮތުގައި އެޗްޑީސީގެ ތެރޭގައި ހިންގަމުން ދިޔަ ހިޔާނާތުގެ އަމަލުތައް ރައީސް އަށް އެނގިވަޑައިގަންނަވާނެ އެވެ.
މިސަރުކާރުން އެޗްޑީސީއަށް އައްޔަންކުރި ފުރަތަމަ ޗެއާމަން -- ޒުހޫރު މަގާމުން ވަކިކުރި ސަބަބެއް މިއަދާ ހަމައަށްވެސް ހާމަކޮށްފައެއް ނުވެ އެވެ.