ކިޔެވުމުގެ އެކި މަރުހަލާތައް ކާމިޔާބު ކުރުމަށާއި އެ މަރުހަލާތަކުގައި އަމަލުތައް ބަހައްޓަންޖެހޭނެ އިރުޝާދުތަކެއް ރައީސުލްޖުމްހޫރިއްޔާ އަބްދުﷲ ޔާމީން މިރޭ ކިޔަވާ ކުދިންނަށް ދެއްވައިފި އެވެ. އެ މަނިކުފާނުގެ މި އިރުޝާދުތައް ދެއްވީއޯލެވެލްގައި ރަންވަނަތައް ހާސިލުކުރި ދަރިވަރުންނާ މުހާތަބު ކުރައްވަ އެވެ. ރައީސްގެ އިރުޝާދުތަކުގެ މައިގަނޑު އަމާޒެއްގެ ގޮތުގައި ވިދާޅުވީ، "ހަމައެކަނި ފޮތުން ކިޔަވައިގެން މޮޅުނުވާނެ" ކަމަށެވެ.
އޯލެވެލް ޓޮޕް އެޗީވާސް އެވޯޑް ހަފުލާ ޝަރަފުވެރިކޮށްވާ ވާހަކަފުޅު ދައްކަވަމުން މިރޭ ރައީސް ޔާމީން ވިދާޅުވީ، ރަންވަނަތައް ހާސިލްކުރި ދަރިވަރުން ކިޔެވުމުގެ ދެން އޮތް މަރުހަލާތަކަށް ދިޔުމުގެ ކުރިން ވަރަށް ބޮޑަށް ވިސްނަން ޖެހޭނެ ކަމަށެވެ. މުހިންމު ނިންމުންތަކެއް ނިންމަންޖެހޭނެ ކަމަށާއި އިތުރަށް ކުރިއަށް ދާނެ ދާއިރާއެއް ކަނޑައަޅައި އެކަމަށް މަސައްކަތް ފަށަން ޖެހޭނެ ކަމަށެވެ. މަސައްކަތް ނުކޮށް ދެން އޮތް މަރުހަލާގައި ކާމިޔާބީތަކެއް ނުހޯދޭނެ ކަމަށް ވެސް ރައީސް ވިދާޅުވި އެވެ.
ރަންވަނަތައް ހާސިލު ނުކުރެވުނު ދަރިވަރުންނަށް ވެސް ރައީސް ވަނީ ހިތްވަރު ދެއްވާ ނަސޭހަތްތެރިވެ ވަޑައިގެންފަ އެވެ. ވިދާޅުވީ، އެކުދިންގެ ހުރި ހުނަރުތައް ދައްކާލުމަށެވެ. ކޮންމެ ކުއްޖެއްގައި ވެސް ފޮރުވިފައި ހުނަރެއް ހުންނާނެ ކަމަށާއި ކިޔެވުމަށް މޮޅުނުވި ނަމަވެސް އެ ހުނަރެއްގައި ކުރިއަރައި ދިނުމަށް އެ މަނިކުފާނު އެދި ވަޑައިގަންނަވާ ކަމަށެވެ.
"ތިޔަ ކުދިންނަކީ ﷲ ރަހުމަތުން ނުވަތަ ކިޔެވުމުގެ ރަހުމަތުން އެއްގޮތަކަށް ވެސް ބަރީއަވެފައި ތިބި ބައެއް ނޫން. ހާޑްވޯކް ކޮށްފިނަމަ މިރޭ އެހާ މޮޅުތި ވަނަތައް ނުލިބޭ ކުދިން އަހަރެމެންނަށް ޕްރޫވް ކޮށްދޭންވީ ތިޔަ ކުދިންނަށް ވެސް މާ ރަނގަޅު ނަތީޖާ ހޯދޭނެކަން މިރޭގެ ބެސްޓް އެޗީވާސްއަށްވުރެ، ދިސް އިޒް އެޑިއުކޭޝަން، ލާނިން، ރީ ލާނިން، އަން ލާނިން، އެހެންވީމަ އެޑިއުކޭޝަން އިންޕޮސިބަލް ނުވަތަ ނުވާނެ ކަމެއް އޮވެގެން ނުވާނެ،" ރައީސް ވިދާޅުވި އެވެ.
ރައީސް ވިދާޅުވީ، ޔުނިވާސިޓީއަށް ދިޔުމުގެ ކުރިން މެންޓޯސް އާއި މައިންބަފައިންނާ މަޝްވަރާކޮށް، ސްޓަޑީ ޕްލޭންތަކެއް ހަދަން ޖެހޭނެ ކަމަށެވެ. ޔުނިވާސިޓީ ނިންމައި، ޑިގްރީ ނަގައި، ގްރެޖުއޭޓްވެ އެ ދާއިރާއަކުން ޑޮކްޓަރީކަން ނެގުމުން ދާން ބޭނުންވާ މަންޒިލަށް ދެވުނީ ކަމަށާއި ޔުނިވާސިޓީއަށް ވަނުމަކީ މި ދިގު ދަތުރުގެ ފެށުން ކަމަށެވެ. މި ދަތުރުގައި ނަގާ އަށެއްކަ އަހަރަކީ ވަރަށް އަވަހަށް ނިމިގެން ދާނެ އަހަރުތަކެއް ކަމަށާއި އެހެންކަމުން ޕްލޭންތަކެއް ނަހަދައި ކުދިންގެ ހުރި ހުނަރުތައް ދެނެ ނުގަނެއްވިއްޖެނަމަ އުނދަގޫތަކެއް ކުރިމަތިވާނެ ކަމަށެވެ.
"ކޮންމެ ކުއްޖަކު ވެސް އެކްސްޕްލޯ ކުރަން ޖެހެނީ ކޮބައިހޭ އަމިއްލަ ސްކިލްއަކީ، އިނާ ސޯލް ސާޗްކުރަންވީ، އޭނާ ގަބޫލުކުރަން ޖެހޭ އެ ކުއްޖެއްގެ އެތޭގައި ސްކިލްތަކެއް އެބަހުރިކަން، ކޮންމެ ކުއްޖަކީ ވެސް ސްކިލް ހުންނާނެ ކުއްޖެއް، ކޮންމެ ކުއްޖަކީ ޑޮކްޓަރަކަށް ނުވަތަ ލޯޔަރަކަށް ނުވެދާނެ، ނަމަވެސް ކޮންމެ ކުއްޖެއްގެ ވެސް ސްކިލެއް ހުންނާނެ، އެ ސްކިލް ދެނެގަތުމުގެ މަރުހަލާ މިއީ،" ރައީސް ވިދާޅުވި އެވެ.
ރައީސް ވިދާޅުވީ، ޔުނިވާސިޓީއަށް ދިޔުމުގެ ކުރިން އަންނަ މަރުހަލާގައި ޕެޝަންއަކީ ކޮބައިތޯ ނޫނީ ސްޓްރެންތްއަކީ ކޮބައިތޯ ނުވަތަ ކިޔާވާނެ މައްދާތަކަކީ ކޮބައިކަމާ މެދު އުފެެދޭ ސުވާލުތައް ހުންނަ ކަމަށެވެ. އަދި ވިދާޅުވީ، އެ ކުއްޖެއްގެ ހުނަރާއި ސްޓްރެންތް އަދި ކިޔާވާނެ މާއްދާތައް އިހުތިޔާރު ކުރާނީ މެންޓޯއެއްގެ އެހީތެރިކަމާއެކު ކަމަށެވެ. އެ ކުއްޖެއްގެ ހުނަރުތައް އެންމެ ރަނގަޅަށް އެނގެނީ އެ ކުއްޖާއަށް ގިނަ ދުވަހު ކިޔަވައިދިން ޓީޗަރަކަށް ކަމަށް ވެސް ރައީސް ވިދާޅުވި އެވެ.
އިތުރަށް ރައީސް ވިދާޅުވީ، ކޮންމެ ކުއްޖަކު ވެސް ކާމިޔާބީއާ ހަމައަށް ވާސިލުވުމަށް މަސައްކަތްކުރަން ޖެހޭނެ ކަމަށާއި ކިޔަވައި ނިމިގެން ކުރާނެ މަސައްކަތެއް އަދި ދިރިއުޅުމުގެ މޯޓިވޭޝަނެއް އޮންނަން ޖެހޭނެ ކަމަށެވެ. އެ މޯޓިވޭޝަން ހަމައެކަނި ފޮތެއްގެ އެހީގައި ނުލިބޭނެ ކަމަށް ރައީސް ވިދާޅުވި އެވެ.
"ދެން ކިޔަވައި ނިމުނީ، ޖޮބް ފުރުސަތު އޮތްވަރެއް ބަލަން ޖެހޭ، ދިރިއުޅުމެއް ބިނާކުރުމަށް މަސައްކަތްކުރަން ޖެހޭ، މުޖުތަމައުގައި ހަރުދަނާ މީހަކަށް ވާން ޖެހޭ، ހެވިލީ ލޯޑެޑް ވާހަކަތެއް އަޑު އިވޭނެ، ކުދިންނަކީ ހަމައެކަނި ފޮތް ގިރާލައިގެން ބޮއެގެން ތިބޭ ބަޔަކަށް ވާން ނުޖެހޭ، އެއްވެސް ކުއްޖަކު ތަރުބިއްޔަތާއި ތައުލީމަކާ ނުލައި ވަށާޖެހޭ ތައުލީމަކާއި ތަރުބިއްޔަތަކާ ނުލައި އަންނަ ކުއްޖެއް ނަމަ އެ ކުއްޖަކީ މުޅި މުޖުތަމައުއަށް ބޭނުން ހިފޭ ކުއްޖަކަށް ނުވޭ،" ރައީސް ވިދާޅުވި އެވެ.
ރައީސް ވިދާޅުވީ، ކޮންމެ ކުއްޖަކު ވެސް ކުރިއަށް ދާންވާނީ އެކުއްޖެއްގެ އެތެރެ ހަށިން ގަބޫލުކުރާ ދާއިރާއަކުން ކަމަށެވެ. އެހެން ނޫނީ ކުރިއަށް އެ ދެވެނީ ރަހުމަތްތެރިޔަކާއެކު ނޫން ކަމަށް ވިދާޅުވި އެވެ. އަދި މަސައްކަތުގެ ދާއިރާއަށް ނިކުންނައިރު އެހެން މީހުންނަށް އިހުތިރާމްކުރަން ދަސްކުރުމަކީ ވެސް މުހިންމު ކަމެއް ކަމަށް ވިދާޅުވި އެވެ.
މީގެއިތުރުން ކިޔެވުމާއި މަސައްކަތްކުރުމުގެ އިތުރުން ކުޅިވަރު ކުޅެ، ޖިމްއަށް ދިޔުމަކީ ވެސް މުހިންމު ކަމެއް ކަމަށެވެ. އެކަމަށް ވަގުތު ކަނޑައަޅައި، ވަގުތު މެނޭޖްކުރުމަކީ އެ ކުއްޖެއްގެ ކަމެއް ކަމަށް ރައީސް ވިދާޅުވި އެވެ. އަދި އެއީ، އެއްވެސް މީހަކު ދަސްކޮށްދޭނެ ކަމެއް ނޫން ކަމަށް ވެސް ރައީސް ވިދާޅުވި އެވެ.
މި ނަސޭހަތްތައް އަޑުއަހައި އަމަލުކުރާ ކުދިންނަށް ކުރިއަށް އޮތް މަރުހަލާތަކުގައި ވެސް ކާމިޔާބު ލިބޭނެ ކަމަށް ރައީސް ވިދާޅުވި އެވެ.