މެޗް ނިމެން މިނެޓަކަށްވެފައި ހުސައިން ޝިމާޒު (ކޮކީ) ކާމިޔާބު ކުރި ލަނޑުން ޔުނައިޓެޑް ވިކްޓަރީ އަތުން ޓީސީ ބަލިވުމުން މެޗަށް ފަހު ދެ ޓީމުގެ މެދުހައި ހަމަނުޖެހުން ހިނގައިފި އެވެ.
މައްސަލަ ގޯސްވީ ޔުނައިޓެޑް ވިކްޓަރީގެ ކުޅުންތެރިން ދަނޑުން ފައިބަމުން ޓީސީގެ ބެންޗަށް ގޮސް ސަލާމްކުރުމުގެ ތެރޭގައި ޓީސީގެ ކެޕްޓަން ޔާމީން އިބްރާހީމް އާއި ޔުނައިޓެޑް ވިކްޓަރީގެ ސީރިއާ ކީޕަރާ ދެމެދު ހިނގި ހަމަނުޖެހުމެއްގަ އެވެ. އަދި ކުރިން ޓީސީ އަށް ކުޅުނު، ޔުނައިޓެޑް ވިކްޓަރީގެ ބްރެޒިލް މިޑްފީލްޑަރު ރަފީނިއާ ވެސް ރުޅިގަދަވެގެން އުޅުނުތަން ފެނުނެވެ. ދެ ޓީމުގެ ކުޅުންތެރިންނާއި ސަޕޯޓަރުން ވެސް ކޮންމެވެސް ވަރަކަށް ދަނޑަށް ނުކުތް މިހާދިސާއަށް ފަހު މައްސަލަ ހައްލުކުރީ ދެ ޓީމުގެ އޮފިޝަލުންނާއި ބައެއް ކުޅުންތެރިން ވެގެންނެވެ.
ޔުނައިޓެޑް ވިކްޓަރީ މި މެޗުން މޮޅުވުމުން ފަސް ވަނައިގައި އޮތީ 18 ޕޮއިންޓާއެކު އެވެ. ރޭ ނިއުރޭޑިއންޓް އަތުން ބަލިވި ވެލެންސިއާ އަށް ލިބިފައިވަނީ 19 ޕޮއިންޓެވެ. މެޗުން ބަލިވި ޓީސީ އޮތީ 24 ޕޮއިންޓާއެކު ތާވަލުގެ ތިން ވަނައިގައެވެ.
މެޗްގެ ފަހު ވަގުތު ޓީސީ އެއް ކުޅުންތެރިޔަކު މަދުކޮށް ކުޅެން ޖެހުނީ، މެޗްގެ 81 ވަނަ މިނެޓްގައި ޔޫވީގެ ޕެނަލްޓީ އޭރިއާގެ ތެރެއިން ޔޫވީގެ އަހްސަންއަށް ކުރި ފައުލާ ގުޅިގެންނެވެ. މި ޕެނަލްޓީ ރަފީނިއާ ފޮނުވާލުމުން ޓީސީގެ ކީޕަރު މުހައްމަދު އިމްރާން ވަނީ ދިފާއުކޮށްފައެވެ.
ޔުވީގެ ލަނޑު މެޗްގެ މެޗްގައި ޓީސީގެ ޝަމްވީލް ގާސިމް (ބޮންޑާ) އާއި އަލީ ފާސީރު (ސެންޓޭ) އާއި މުރުތަލޯއަށް ވަނީ ލަނޑު ޖާހާނެ ރަނގަޅު ފުރުސަތުތައް ލިބިގެންގޮސްފައެވެ.
ލީގްގައި މިރޭ ބައްދަލު ކުރާނީ ތާވަލުގެ އެއް ވަނައިގައި އޮތް މާޒިޔާ އާއި ދެ ވަނައިގައި އޮތް އީގަލްސްއެވެ. މިއަދުގެ މެޗަށް ފަހު ވެސް ޕްރެސް ކޮންފަރެންސް ނުބާއްވަ އެވެ.