ރާއްޖެ ކުޅިވަރު

ހާއްސަ މެޗަށް ޒަވީ މާލެ އަތުވެއްޖެ

Aug 28, 2016
1

މާދަމާރޭ ރާއްޖޭގެ ގައުމީ ޓީމަށް ދެކޮޅަށް ސާފް ޗެމްޕިއަންޝިޕް ފުޓްބޯޅަ މުބާރާތް ކާމިޔާބުކުރި ގޯލްޑް ޓީމު ކުޅޭ ދައްކާލުމުގެ މެޗަށް ބާސެލޯނާ އާއި ސްޕޭނުގެ ކުރީގެ މިޑްފީލްޑަރު ޒަވީ ހަނާންޑޭޒް މާލެ އަތުވެއްޖެ އެވެ.

އުމުރުން މިހާރު 36 އަހަރުގެ ކުޅުންތެރިޔާ މި މެޗުގައި ނުކުޅޭނެ އެވެ.މި މެޗުގައި އާޖެންޓީނާގެ ކުރީގެ ޑިފެންޑަރު ރޮބާޓޯ އަޔާލާ ކުޅޭގޮތަށް ވަނީ ހަމަޖެހިފަ އެވެ. މިއީ މި ފެންވަރުގެ ކުޅުންތެރިއަކު ގަލޮޅު ދަނޑުގައި ކުޅޭ ފުރަތަމަ ފަހަރެވެ.

އެފްއޭއެމުގެ ރައީސް އަހުމަދު ތޯރިގް (ޓޮމް) ވިދާޅުވީ މިއީ ރާއްޖޭގެ ފުޓްބޯޅަ އެހެން ހަރުފަތަކަށް ގެންދިއުމަށް ގައުމީ ފުޓްބޯޅަ އިދާރާއިން ފަށާފައިވާ މަސައްކަތުގެ މުހިންމު ހަރަކާތެއް ކަމަށެވެ. އަދި ދުނިޔޭގެ ފުޓްބޯޅައިގެ ބޮޑު ބްރޭންޑަކަށްވެފައިވާ ކުޅުންތެރިއަކު މި މެޗަށް އައުމަކީ ދިވެހި ފުޓްބޯޅަ ސަޕޯޓަރުންނަށް ލިބިގެންދާނެ ވަރަށް ބޮޑު ހިތްހަމަޖެހުމަކަށްވާނެ ކަމަށެވެ.

ގަތަރުގެ އަލްސާދަށް ކުޅެމުން އަންނަ ޒަވީ އަކީ 2010 ވަނަ އަހަރުގެ ވޯލްޑް ކަޕާއި 2008 އާއި 2012 ވަނަ އަހަރުގެ ޔޫރޯ ކާމިޔާބު ކުރި ސްޕޭނުގެ އެންމެ މުހިންމު އެއް ކުޅުންތެރިޔާ އެވެ. އަދި ބާސެލޯނާ އަށް އެންމެ ފަހުން ޗެމްޕިއަންސް ލީގު ކާމިޔާބުކޮށްދިން ކެޕްޓަނަކީ ވެސް އޭނާ އެވެ. ޒަވީ ވަނީ ސްޕޭނުގެ ގައުމީ ޓީމަށް 133 މެޗު ކުޅެދީ 13 ގޯލު ޖަހާދީފަ އެވެ. އަދި ބާސެލޯނާ އަށް 505 މެޗުން 58 ގޯލު ޖަހާދީފައިވެ އެވެ.