ސަރުކާރުގެ މައި ޖަލު ހުންނަ އަދި ގިނަ އަދެއްގެ ގެސްޓް ހައުސް ހިންގާ މާފުއްޓަށް މަސްތުވާތަކެތި ހިފައިގެން ދިޔަ އަންހެންކު ހައްޔަރުކޮށްފި އެވެ.
ފުލުހުން ބުނީ އުމުރުން 32 އަހަރުގެ ދިވެހި އަންހެން މީހާ އަތުލައިގަނެ ހައްޔަރު ކުރީ މާލެއިން މާފުއްޓަށް ދަތުރު ކުރި ފެރީއަކުން މަސްތުވާތަކެތި އެ ރަށަށް ގެންދާ ކަމަށް މައުލޫމާތު ލިބިގެން ހިންގި އޮޕަރޭޝަނުގައި އިއްޔެ ހަވީރު މާފުށީ ބަނދަރުން ކަމަށެވެ.
އޭނާ ހައްޔަރު ކޮށް ހަށިގަނޑު ބަލައި ފާސްކުރި އިރު އޭނާ ގެންގުޅުނު އަތްދަބަހުގައި އޮތް ކޮތަޅަކުން މަސްތުވާތަކެތި ކަމަށް ޝައްކުކުރެވޭ އެއްޗެއްހުރި ހަތް ޕެކެޓަކާއި މަސްތުވާތަކެތިކަމަށް ޝައްކުކުރެވޭ އެއްޗެއްހުރި ބޮޑު ރަބަރު ޕެކެޓެއް ފެނުނެވެ.
އެ މީހާއަކީ މަސްތުވާތަކެތީގެ މައްސަލަތަކުގެ ރެކޯޑްތައް ކުރިން ވެސް އޮންނަ މީހެކެވެ. ހައްޔަރު ކުރުމަށްފަހު އޭނާގެ ކުޑަކަމުދާ ތަކެތި ޓެސްޓްކުރި އިރު މަސްތުވާތަކެތީގެ ދެބާވަތަކަށް ޕޮޒެޓިވްވި އެވެ.
އޭނާގެ ބަންދަށް 15 ދުވަސް ކޯޓުން ހޯދައި މިހާރު ގެންދަނީ މައްސަލަ ތަހުގީގު ކުރަމުންނެވެ.
މާފުއްޓަށް ދިޔަ އަންހެން މީހާގެ އަތުން ފެނުނު މަސްތުވާތަކެތީގެ ޕެކެޓްތައް -- ފޮޓޯ: ޕޮލިސް