މޫސުމާއި ތިމަވެއްޓަށް އަންނަ ބަދަލުތަކުން ރައްކާތެރިވުމަށް ޖައްވަށް ދޫކުރާ ކާބަން މަދު ކުރުމުގެ މުއާހަދާ ޕެރިސްގެ އެއްބަސްވުން ތަސްދީގް ކުރުމަށް ދުނިޔޭގެ އެންމެ ބޮޑު ދެ އިގްތިދސޯދު ކަމަށްވާ އެމެރިކާ އާއި ޗައިނާއިން އެއްބަސް ވެއްޖެއެވެ.
ޗައިނާގެ އެމެރިކާގެ ރައީސް ބަރަކު އޮބަމާ އާއި ޗައިނާގެ ރައީސް ޝީ ޖިންޕި މިގޮތަށް އެއްބަސްވެ ވަޑައިގަތީ ޗައިނާގެ ހޭންގްޒިގައި މިހާރު ފަށާފައިވާ، ޖީ 20 ސަމިޓްގަ އެވެ.
އެމެރިކާ އާއި ޗައިނާ އަކީ ޖައްވަށް ބޭރުކުރާ ވިހަ ގޭސް އެންމެ ގިނައިން ބޭރު ކުރާ ދެ ގައުމެވެ. ސަމިޓްގެ ހަވާސާގައި ދެ ބޭފުޅުން ބައްދަލު ކުރައްވި ބައްދަލުވުމުގައި އެމެރިކާގެ ރައީސް ބަރަކު އޮބާމާ ވިދާޅުވީ "މުސޫމަށް އަންނަ ބަދަލުތަކާ ބެހޭ މުއާހަދާ ތަސްދީގް ކުރުމަށް ނިންމީ ދުނިޔޭގެ ތިމާވެށީ ސަލާމަތް ކުރުމަށް" ކަމަށެވެ.
ޝީ ވިދާޅުވީ ޗައިނާ އާއި އެމެރިކާގެ ނިންމުމުން، އެހެން ގައުމުތަކުންވެސް މިކަން ކުރަން ހިތްވަރު ލިބޭނެ ކަމަށް އުންމީދު ކުރާ ކަމަށެވެ.
ދުނިޔެއަށް ދޫކުރާ ވިހަ ގޭސްތަކުގެ 40 ޕަސަންޓް ބޭރު ކުރަނީ ޗައިނާ އާއި އެމެރިކާއިންނެވެ. މިދިޔަ އަހަރު އެކުލަވާލެވުނު ޕެރިސްގެ މުއާހަދާއަކީ ގްރީން ހައުސް ގޭހުގެ ސަބަބުން، ދުނިޔޭގެ މޫސުމަށް އަންނަ ބަދަލުތައް އެއްވަރެއްގައި ހިފެހެއްޓުމަށް ވެވުނު އެއްބަސްވުމެކެވެ. އެމެރިކާ އާއި ޗައިނާއިން އެއްބަސްވުން ތަސްދީގް ކުރުމުން 2030 ވަނަ އަހަރު އަންނަންވާއިރަށް ޖަވަށް ބޭރު ކުރަ ވިހަ ގޭހުގެ މިންވަރު ދަށް ކުރަން ޖެހޭނެއެވެ.