ޗައިނާގައި ކުރިއަށްދާ "ޖީ 20" ގެ ސަމިޓްގައި އެމެރިކާގެ ރައީސް ބަރަކު އޮބާމާއާ ބައްދަލު ކުރައްވައި، އެމެރިކާގެ ރައީސް ބަރަކު އޮބާމާއަށް ތުރުކީގެ ރައީސް ރަޖަބު ތޮއްޔިބު އުރުދުގާން ޓެރަރިސްޓުންނާ ބެހޭ ރަނގަޅު ފިލާވަޅެއް ނަންގަވައި ދެއްވައިފި އެވެ.
ސަމިޓްގެ ހަވާސާގައި އޮބާމާ އާއި އުރުދުގާން ވަނީ 45 މިނެޓްގެ ބައްދަލުވުމެއް ބާއްވާފަ އެވެ. މިއީ ޖުލައި މަހު ތުރުކީއަށް ގެންނަން އުޅުނު "ބަޣާވާތަށް" ފަހު، އޮބާމާ އާއި އުރުދުގާން ބައްދަލު ކުރެއްވި ފުރަތަމަ ފަހަރެވެ.
އޮބާމާ އާއި އުރުދުގާންގެ މަޝްވަރާތައް ކުރިއަށް ގެންގޮސްފައި ވަނީ ތުރުކީން ސީރިޔާގެ ހަރަކާތްތެރިވާ އިސްލާމިކް ސްޓޭޓާ ދެކޮޅަށް "އިޔުޕްރޭޓްސް ޝީލްޑް" ގެ ނަމުގައި ހާއްސަ އޮޕަރޭޝަނެއް ފެށިތާ ދެ ހަފުތާ ފަހުންނެވެ. ތުރުކީ އާއި އެމެރިކާއަކީ ވެސް ނޭޓޯގެ ދެ ބައިވެރިންނެވެ.
އުރުދުގާން ވިދާޅުވީ ގައުމުތަކުގެ މެދުގައި "ހާއްސަ ގުޅުން" ތަކެއް އޮންނަ ކަމަށާއި، ހާއްސަކޮށް ނޭޓޯގެ ގައުމަކަށް ކުރިމަތިވާ ކަމެއްގައި، އެއް ގައުމު އަނެއް ގައުމުގެ މެދުގައި ދެކެން ޖެހޭނީ އެއް ނަޒަރަކުން ކަމަށެވެ. އަދި އެކި ގައުމުތަކަށް ނުރައްކާ ކުރިމަތި ކުރާ ޓެރަރިސްޓް ގުރޫޕްތައް ތަފާތު ވިޔަސް އަނެއް ގައުމުންވެސް އެ ގުރޫޕަކީ ޓެރަރިސްޓް ގުރޫޕެއްގެ ގޮތުގައި ކަނޑައަޅަން ޖެހޭ ކަމަށެވެ.
އުރުދުގާން މިހެން ވިދާޅުވިއިރު ތުރުކީން ހަނގުރާމަ ކުރަމުންދާ ޕީކޭކޭ އާއި ޕޯވައިޑީ އަދި ވައިޕީޖީ އަކީ އެމެރިކާއިން ޓެރަރިސްޓް ގުރޫޕްތަކުގެ ގޮތުގައި ބަލާ ޖަމާއަތްތަކެއް ނޫނެވެ. ތުރުކީގެ ބައެއް ރައްޔިތުން ގަބޫލު ކުރާ ގޮތުގައި އެމެރިކާގެ ހަތިޔާރު ޕީކޭކޭ އިން ބޭނުން ކުރުމަކީ ސުވާލު އުފައްދަން ޖެހޭ ކަމަކެވެ.
"ޓެރަރިސްޓުންގެ ތެރޭގައި ވަކި ރަނގަޅު މީހުންނާއި ގޯސް މީހުނެއް ނޫޅޭނެ. ޓެރަރިސްޓުން ވެއްޖެއްޔާ އެ ވާނީ ހަމަ ގޯހުން ގޯހަށް" އޮބާމާގެ އަރިހުގައި އުރުދުގާން ވިދާޅުވިއެވެ.
އުރުދުގާން ވިދާޅުވީ އައިއެސް އާ ދެކޮޅަށް ތުރުކީން ހަނގުރާމަ ކުރާ ފަދައިން ޕީކޭކޭ އާއި ޕީވައިޑީ އާއި ވައިޕީޖީގެ ޓެރަރިސްޓުން ޖަމާއަތްތަކާ ދެކޮޅަށް ހަނގުރާމަ ކުރަމުންދާ ކަމަށާއި އެގޮތުގައި އެ ހަރަކާތް ކުރިއަށް ގެންދާނެ ކަމަށެވެ. އަދި އައިއެސްއާ ދެކޮޅަށް ކުރާ ހަނގުރާމައިގައި އެމެރިކާގެ އެއްބާރުލުން ލިބޭ ފަދައިން އެހެން ޖަމާއަތްތަކާ ދެކޮޅަށް ވެސް އެއްބާރުލުން ދިނުމަށް އޮބާމާގެ އަރިހުގައި އުރުދުގާން ވިދާޅުވިއެވެ.
ތުރުކީއަށް ޖުލައި 15 ވަނަ ދުވަހު ގެންނަން އުޅުނު "ބަޣާވާތު" ގެ އިސް މުގުލެއްގެ ގޮތުގައި ހުންނެވި ކަމަށް ތުރުކީން ތުހުމަތު ކުރަނީ އެމެރިކާގެ ދިރިއުޅެމުންދާ ތުރުކީގެ ދީނީ އިލުމްވެރިޔާ އަދި ވިޔަފާރި ވެރިޔާ ފަތުﷲ ގްލެން އަށެވެ. ބައްދަލުވުމުގައި އޮބާމާ އާއި އުރުދުގާން ވަނީ އެކަމަށް އަލިއަޅުވާލައި ވާހަކަ ދައްކަފައެވެ.