އިސްރާއީލުން ފަލަސްތީނުގެ ގާޒާއަށް އަޅާފައިވާ ހިސާރު ކުރުމުގެ ފިޔަވަޅުތަކާ ހެދި، ޕެޓްރޯލާއި ޑީސަލްގެ ދަތިކަން ވަނީ ކުރިމަތިވެފައެވެ. އިންސާނީ އަސާސީ ހިދުމަތެއްކަމުގައިވާ ކަރަންޓްގެ ހިދުމަތުން އެ ސިޓީގެ ގިނަ ސަރަހައްދުތަކެއް ވަނީ މަހުރޫމްވެފަ އެވެ. ގިނަ ވެހިކަލްތަކެއް ހުރީ ޕެޓްރޯލާއި ޑީސަލް ނެތިގެން ހުރީ، ހުއްޓިފަ އެވެ. ގާޒާގެ އެތެރޭގައި ދަތުރުފަތުރު ވަނީ މުޅިންހެން ހުއްޓިފަ އެވެ. މިއީ އދ އާއި ބައިނަލްއަގްވާމީ ގަރާރުތަކާ ހިލާފަށް އިސްރާއީލުގެ ހަރުކަށި އަމަލުތަކުގެ ޝިކާރައަކަށްވެފައިވާ ގައްޒާގެ ހާލަތުގެ ކުޑަ މިންވަރެކެވެ.
ނަމަވެސް ގައްޒާއަށް ނިސްބަތްވާ ދެ ޒުވާނަކު ވަނީ އެ ސިޓީ އާއި މުޅި ފަލަސްތީނު ހެއްވާލާފަ އެވެ. ޕެޓްރޯލާއި ޑިސަލް ނެތިގެން އެއްގަމު އުޅަނދުތައް ހުއްޓާލަން ނުޖެހޭނެ ކަމުގެ އުންމީދެއް އޭނާގެ މަސައްކަތުން މި ވަނީ ގެނެސްދީފަ އެވެ. ޖަމާލް އަލް މިގާތީ އާއި ހާލިދު އަލް ބަރުދަވީ ވަނީ އަވިން އުފައްދާ ހަކަތައިން، ދުއްވާ ކާރެއް އުފައްދާފަ އެވެ.
ޖަމާލު އާއި ހާލިދު އަކީ މިސްރުގެ އަޒުހަރު ޔުނިވަސިޓީގައި އިންޖީނިއަރިން ކިޔަވާ ދެ ދަރިވަރުންނެވެ. އުމުރުން 23 އަހަރުގެ މި ދެ ދަރިވަރުންނަކީ އިންޖިނިއަރިންގެ އެންމެ ފަހު ސެމިސްޓަރުގައި ކިޔަވަމުންދާ ދެ ދަރިވަރުންނެވެ. އެހެންވެ މި އުފެއްދުމަކީ އެ ކުދިންގެ ޔުނިވަސިޓީގެ ޕްރޮޖެކްޓެވެ.
"އަހަރެމެން ނިންމީ ﷲ އަހަރެމެންނަށް ދެއްވާފައިވާ ވިސްނުން ބޭނުންކޮށްގެން އުފައްދާ ހަކަތައަށް ބަރޯސާވާން. އެއީ އިއާދަ ކުރުވަނިވި ހަކަތަ. މިހާރު ވެހިކަލްތައް އާންމުކޮށް ދުއްވާ ގޮތަށްވުރެ އެހެން ގޮތަކަށް ދުއްވުން. އެއީ ވައި ނުސާފުވުމުންނާ ޖައްވަށް ދޫކުރާ ވިހަ ގޭސްތަކުން ރައްކާތެރިވުމަށް އޮތް ހައްލު" ހާލިދު ބުންޏެވެ.
ދުނިޔޭގެ އެހެން ހިސާބުތަކާ ހިލާފަށް ގާޒާގައި ސޯލާ ކާރެއް އުފެއްދުމަކީ ފަސޭހަ ކަމެއް ނޫނެނެވެ. އެ ކާރު އުފެއްދުމުގައި އެ ދަރިވަރުންނަށް ކުރިމަތިވީ، މަދު ވަސީލަތްތަކުގެ ސަބަބުން މަސައްކަތް ކުރުމަށް އެޅިފައިވާ ހުރަސް އެކަންޏެއް ނޫނެވެ. އެކަމަށް ބޭނުންވާނެ ޑީސީ މޯޓަރެއްވެސް ގައްޒާއިން ލިބޭކަށް ނެތެވެ. ޖަމާލު ބުނީ އެއްވެސް މީހަކަށް ޑީސީ މޯޓަރެއް ހަދާކަށްވެސް ނޭންގެ އެވެ. ސޯލާ ކާރު ހެދުމަށް، އެކާރުގައި ޖެހުނީ އެހެން މޯޓަރެއް ހަރުކުރާށެވެ.
ގާޒާގެ އަލް އަޒުހަރު ޔުނިވަސިޓީގެ ލެކްޗަރާ މާޒިން އަބޫ އާމިރު އުންމީދަކީ ސޯލާ ކާރުން، ގާޒާގެ އެހެން ކަންކަމަށްވެސް ސޯލާ ޕަވާ ބޭނުން ކުރުމުގެ ހިތްވަރަކަށް ވުމެވެ.
"މި ވެހިކަލް އުފައްދައިގެން އަހަރުމެން ބޭނުންވަނީ މިއީ އެހެން ކަންކަމަށްވެސް މިސާލަކަށް ދައްކަން. އަހަރެމެން ބޭނުމީ އެހެން ޕްރޮޖެކްޓް ތަކަށްވެސް ސޯލާ ޕަވާ ބޭނުން ކުރުމުގެ ހޭލުންތެރިކަން އުފައްދަން. އެ ސަގާފަތް ގާޒާގައި ދަމަހައްޓަން" މާޒިން ވިދާޅުވިއެވެ.
އަޒުހަރު ޔުނިވަސިޓީން ބުނީ ކަރަންޓުން ދުއްވާ ކާރުވެސް، ސޯލާ ޕެނަލް ބޭނުންކޮށްގެން ދުއްވޭނެ ގޮތަށް ހެދުމަށް ދަރިވަރުން މަސައްކަތް ކުރަމުންދާ ކަމަށެވެ. މިއީ ގައްޒާއަށް ކުރިމަތިވެފައިވާ ކަރަންޓް ނުލިބުމުގެ މައްސަލައަށްވެސް އޮތް ހައްލެކެވެ. އދ ގެ ހިޔުމަން އެފެއާޒުން ބުނީ ގާޒާގައި ކަރަންޓް ބޭނުންވާ ސަރަހައްދުތަކަށް ކޮންމެހެން ބޭނުންވާ، 470 މެގަވޮޓްގެ ކަރަންޓްގެ ދެ ބައިކުޅަ އެއްބައިވެސް ނުލިބޭ ކަމަށެވެ.