ދުނިޔޭގެ ޚަބަރުތަކަށް ބަލަނީ ނަމަ މި ދުވަސްކޮޅު އެންމެ ގިނަ ދިވެހިން ޝައުގުވެރިވާ ނުވަތަ ދިވެހިންގެ އިހްސާސްތަކާ އެންމެ ބޮޑަށް ކުޅެލާ ޚަބަރަކަށް ވެފައި އޮންނާނީ ޔޫރަޕުގައި، ވަކިން ހާއްސަކޮށް ފްރާންސްގައި މުސްލިމުންނަށް ފުރައްސާރަކޮށް، މޫނު ބުރުގާ އާންމު ތަންތަނުގައި މަނާކުރަމުން ގެންދާ ޚަބަރެވެ.
އެކަމަކު މިއަދުގެ ބޮޑު ޚަބަރު މި އޮތީ އޭގެ އަނެއްކޮޅަށް އެނބުރިފަ އެވެ. -- މޫނުބުރުގާ އެޅުން މަޖުބޫރު ކަމަށް ބުނެ ބަޑިންނާއި ކަނޑިން ބިރު ދެއްކި ޓެރަރިސްޓް ޖަމާއަތް، އިސްލާމިކް ސްޓޭޓް (އައިއެސް) އިން ވެސް އެންމެފަހުން އެ ހިޔާލު ބަދަލުކޮށް މޫނު ބުރުގާ މަނާކުރީ އެވެ.
އައިއެސްގެ މައި ރަށް ކަމުގައިވާ، އިރާގުގެ މޫސަލްގައި މޫނު ބުރުގާ އަޅައިގެން އުޅުމަކީ މިހާރު މަނާ ކަމެކެވެ. އައިއެސްގެ ހަނގުރާމަވެރިން މޫނުބުރުގާ އަށް ބިރުގަންނަވާލީ މޫނުބުރުގާ އަޅައިގެން ދިޔަ ބަޔަކު އައިއެސްގެ އިސް ކޮމާންޑަރުންތަކަކަށް އަމާޒުކޮށް ދިން ބޮމުގެ ހަމަލާތަކަކާ ގުޅިގެންނެވެ.
ވަކިން ހާއްސަކޮށް މޫނުބުރުގާ އެޅުން އައިއެސް އިން މަނާކޮށްފައި ވަނީ އެމީހުންގެ ރަސްމީ އިމާރާތްތަކުގަ އެވެ.
ސަލާމަތީ ސަބަބުތަކާ ހެދި ކަމަށް ބުނެ އައިއެސް އިން އެމީހުންގެ މައިރަށުގައި މޫނުބުރުގާ މަނާކޮށްފައިވާއިރު ޔޫރަޕުގައި ވެސް މޫނުބުރުގާ މަނާކުރަމުން އަންނަ ގައުމުތަކުން އެކަން ކުރަމުންދަނީ ސަލާމަތީ ސަބަބުތަކަށްޓަކައި ކަމަށް ބުނެ އެވެ.
