ތަހުގީގު ޖަލު، ދޫނިދޫގައި ހައްޔަރުކޮށްފައި ހުރި ކުރީގެ ޑިފެންސް މިނިސްޓަރު މުހައްމަދު ނާޒިމް މިނިވަން ކުރުމަށް އަދާލަތު ޕާޓީން ގޮވާލައިފި އެވެ.
ނާޒިމް ހައްޔަރު ކުރިތާ އެތައް ދުވަހެއް ފަހުން އަދާލަތު ޕާޓީގެ ގޮވާލުން އައީ ރޭގައެވެ. އަދާލަތުގެ ބަޔާން ރޭގައި ނެރުނު ނަމަވެސް އެ ޕާޓީގެ ރައީސް ޝައިހު އިމްރާން އަބްދުﷲ ޓްވިޓާ އާއި ފޭސްބުކް މެދުވެރިކޮށް ނާޒިމްގެ މިނިވަން ކުރުމަށް ވަނީ ކުރިން ގޮވާލަފަ އެވެ.
އަދާލަތުން ނެރުނު ބަޔާނުގައި ބުނަނީ ގާނޫނުއަސާސީ އާއި ގާނޫނުތަކުން ކަނޑައަޅާފައިވާ ތަރަހަތަަކުގެ ތެރެއިން، އަދުލުވެރިކަމަށް ވާސިލްވާނެހެން މަަސައްކަތް ކުރަންޖެހޭނެ ކަމަށާއި ހެކި ހުރިނަމަ ނަމަަ އަމަލު ކުރަންވާނީ ހުރިހާ އެންމެނަށް ހަމަހަމައަށް ކަމަށެވެ.
ނާޒިމް ހައްޔަރުކޮށްފައި ވަނީ ދައުލަތާ އިދިކޮޅު އަމަލެއް ހިންގަން އުޅުއްވުމުގެ ތުހުމަތަށެވެ. އެ ތުހުމަތުތައް އޭނާގެ އަނބިކަނބަލުން އަފާފް އަބްދުލް މަޖީދަށް ވެސް ކުރެއެވެ.
އަދާލަތުން ބުނަނމީ ނާޒިމާއި އޭނާގެ އަނބިކަނބަލުންގެ މައްޗަށް ހިންގޭ ޝަރީއަތަކީ، ގާނޫނުތަކާއި ގަވައިދުތަކާއި އުސޫލުތަކުގެ ބޭރުން ހިންގޭ، ޝަރީއަތެއް ކަމަށެވެ.
"... މުހައްމަދު ނާޒިމް ވަގުތުން މިނިވަން ކުރުމަށާއި އެ ދެކަނބަލުންގެ ގެއްލިފައިވާ ދުސްތޫރީ ހައްގުތައް ހިމާޔަތް ކުރުމަށް ގޮވާލަމެވެ. އެއްވެސް ދިވެހި ރައްޔިތެއްގެ މައްޗަށް ނުހައްގުން ދައުވާ ނުކުރުމަށާއި އަނިޔާވެރިކަން އިސް ނުކުރުމަށް ވެސް މި ފުރުސަތުގައި އިލްތިމާސް ކުރަމެވެ." އެ ބަޔާނުގައި ވެއެވެ.
ނާޒިމާއި އަނބިކަނބަލުންގެ މައްޗަށް އުފުލާފައިވާ ޓެރަރިޒަމްގެ ދައުވާގެ ޝަރީއަތުގެ ފުރަތަމަ އަޑު އެހުން މިއަދު ހަވީރަށް ވަނީ ތާވަލްކޮށްފައެވެ.