އިންޑިޔާގެ ނިއު ދިއްލީގައި މި އަހަރުގެ ނޮވެމްބަރު 21-22 އަށް ބާއްވާ އިންވެސްޓްމަންޓް ފޯރަމްގެ ފުރަތަމަ ސްޕޮންސާ ޕާޓްނަރަކަށް ސަރުކާރުގެ ވިޔާފާރި މަރުކަޒް (އެސްޓީއޯ) ހަމަޖައްސައިފި އެވެ. ޕާޓްނާޝިޕް އެއްބަސްވުމުގައި އިކޮނޮމިކް މިނިސްޓްރީއާ އެކު އެސްޓީއޯއިން ސޮއިކުރީ މިއަދު އެވެ. އެސްޓީއޯ އަކީ މީގެ ކުރިން ބޭއްވި ދެ އިންވެސްޓްމަންޓް ފޯރަމްގެ ވެސް ސްޕޮންސަރެކެވެ.
މިއަދު އެސްއީޒެޑް އޮފީހުގައި ބޭއްވި ރަސްމިއްޔާތެއްގައި ޕާޓްނާޝިޕް އެއްބަސްވުމުގައި އިކޮނޮމިކް މިނިސްޓްރީގެ ފަރާތުން ސޮއިކުރެއްވީ ޑެޕިއުޓީ މިނިސްޓަރު އާދަމް ތައުފީގް އެވެ. އެސްޓީއޯގެ ފަރާތުން ސޮއި ކުރެއްވީ މެނޭޖިން ޑިރެކްޓަރު އަހުމަދު ޝަހީރު އެވެ.
އިންޑިޔާ ޗެމްބާ އޮފް ކޮމާސް އެންޑް އިންޑަސްޓްރީޒް [ފިކީ] އާ ގުޅިގެން، ބާއްވާ އެ ފޯރަމްގެ ފުރަތަމަ މެއިން ސްޕޮންސާއަކަށް އެސްޓީއޯ ހަމަޖެހިގެންދިއުމާ ގުޅިގެން ޑެޕިއުޓީ މިނިސްޓަރު އާދަމް ތައުފީގް ވިދާޅުވީ، މިއަހަރުގެ އިންވެސްޓް ފޯރަމްގައިވެސް ގިނަ އަދަދެއްގެ ވިޔަފާރިވެރިން ބައިވެރިވާ އިރު، އެފަދަ ފޯރަމަކަށް އެސްޓީއޯ ފަދަ ކުންފުންޏަކުން އިސްނެގުމަކީ ފޯރަމްގެ މުހިއްމުކަން ހާމަވާ ކަމަށެވެ.
އެސްޓީއޯގެ އެމްޑީ ޝަހީރު ވިދާޅުވީ، ފާއިތުވި ދެއަހަރު ބޭއްވި އިންވެސްޓްމަންޓް ފޯރަމްގެ ޕާޓްނަރެއްގެ ގޮތުން އެކުންފުންޏަށް ފާހަގަކުރެވުނީ، އިންވެސްޓްމަންޓް ފޯރަމަކީ އިގްތިސާދަށް ވަރަށް ގިނަ ފައިދާތަކެއް ލިބިގެންދާ ފޯރަމެއް ކަމަށެވެ. އަދި ހާއްސަކޮށް މި ފަހަރުގެ ފޯރަމް ބޭއްވިގެންދަނީ ރާއްޖެއާއެކު ވިޔަފާރީގެ ގުޅުން އެންމެ ވަރުގަދަކޮށް އޮތް އިންޑިއާގައި ކަމަށް ވުމުން، ފޯރަމުން ވަރަށް ގިނަ މަންފާތަކެއް ލިބިގެންދާނެ ކަމަށް ގަބޫލުކުރައްވާ ކަމަށެވެ.
މޯލްޑިވެސް އިންވެސްޓްމަންޓް ފޯރަމަކީ ކޮންމެ އަހަރަކުވެސް، ދުނިޔޭގެ ކޮންމެވެސް އެއްގައުމެއްގައި ރާއްޖެއަށް އިންވެސްޓްކުރެވެން ހުރި ދާއިރާތަކާއި ރާއްޖެއިން ގެންނަން ބޭނުންވާ އިންވެސްޓްމަންޓް ތަކާ ބެހޭގޮތުން ފުޅާ ދާއިރާއެއްގައި މައުލޫމާތު ދިނުމަށް ބާއްވާ ފޯރަމެކެވެ.
ނިއު ދިއްލީގެ ތާޖުޕެލެސްގައި ބާއްވާ މި އަހަރުގެ އިންވެސްޓްމަންޓް ފޯރަމްގައި ބައިވެރިވުމަށް އިކޮނޮމިކް މިނިސްޓްރީން ވަނީ ވިޔަފާރިތަކަށް ފުރުސަތު ހުޅުވާލާފަ އެވެ. މީގެ އިތުރުން މި އަހަރުގެ ފޯރަމް ސްޕޮންސާ ކުރުމަށް ތިން ޕެކޭޖެއް ވެސް ތައާރަފްކޮށްފައިވެ އެވެ.