މި އަހަރު ޕާކިސްތާނުގެ އިސްލާމްއާބާދުގައި ބޭއްވަން ހަމަޖައްސާފައިވާ ސާކް ސަމިޓް ފަސްކޮށްފި އެވެ. މި ސަމިޓް ފަސްކޮށްފައިމިވަނީ އިންޑިއާ، ބަންގްލަދޭޝް، ބޫޓާން އަދި އަފްގާނިސްތާން ސަމިޓް ބޮއިކޮޓްކުރުމާ ގުޅިގެންނެވެ. ސާކް ސަމިޓް ކުރިން ބޭއްވުމަށް ހަމަޖައްސާފައި އޮތީ އަންނަ ނޮވެމްބަރު މަހު އެވެ.
ރާއްޖެ ވެސް މުހިންމު ދައުރެއް އަދާކުރާ ސާކްގެ ސެކްރެޓޭރިއަޓްކަން ކުރާ ނޭޕާލްއިން މިއަދު ބުނީ، ސާކް ސަމިޓް ފަސްކުރުމަށް ނިންމާފައިވާ ކަމަށެވެ. ހަތަރު ގައުމަކުން ސަމިޓް ބޮއެކޮޓްކޮށްފައިވީ ނަމަވެސް ލަންކާ އަދި ރާއްޖޭގެ އެއްބާރުލުން ލިބެމުންދާ ކަމަށް ނޭޕާލް ބުނެފައިވެ އެވެ.
ސާކްގެ މެންބަރު އަށް ގައުމުގެ ތެރޭން އެއްވެސް ގައުމަކުން ސަމިޓުގައި ބައިވެރިނުވާނަމަ އޮޓޮމެޓިކުން ސަމިޓް ފަސްކޮށް ނުވަތަ ކެންސަލްވާނެ ކަމަށް އަމަލުކުރަމުން އަންނަ އުސޫލުގައިވެ އެވެ.
މަސްރަހު ހޫނުވެފައިވާ ކަޝްމީރުގެ މައްސަލައާ ހެދި ޕާކިސްތާންގައި ބާއްވާ ސަމިޓް އިންޑިއާއިން ބޮއިކޮޓް ކުރީ ޓެރަރިޒަމްއަށް ހިތްވަރުދޭ ގައުމަކާއެކު ސަރަހައްދީ ގުޅުންތައް ބަދަހި ނުކުރެވޭނެ ކަމަށް ބުނެ އެވެ.
"ސާކް ސަމިޓް ބާއްވާ ގައުމުގައި ސަމިޓް ބޭއްވޭނެ ފަދަ މާހައުލެއް އުފެއްދުމަށް މަސައްކަތް ނުކުރާތީ 19 ވަނަ ސާކް ސަމީޓްގައި ބަންގްލަދޭޝް ބައިވެރި ނުވުމަށް ނިންމަން" ބަންގުލަދޭޝްއިން ނެރެފައިވާ ބަޔާނުގައި ބުނެފައިވެ އެވެ.
ސާކްގެ މި ދައުރުގެ ރިޔާސަތު ބަލަހައްޓަމުންދާ ނޭޕާލްގެ މަސްދަރަކުން ބުނެފައިވަނީ އަފުގާނިސްތާންގެ އެތެރޭގައި ޓެރަރިޒަމްގެ ނުރައްކާ ބޮޑުވެ ސަމިޓަށް ވަޑައިގަނެވޭނެ މާހައުލެއް އޮތް ކަމަށް އަފުގާނިސްތާންގެ ރައީސް މުހައްމަދު އަޝްރަފު ގާނީ އަށް ފެނިވަޑައިނުގަންނަވާ ކަމަށް މިހާރު ރިޔާސަތު ބަލަހައްޓާ ނޭޕާލަށް ވަނީ އަންގާފަ އެވެ.
ބޫޓާންގެ ރަސްގެފާނުގެ އޮފީހުން ބުނެފައިވަނީ ސަރަހައްދުގައި ޓެރަރިޒަމްގެ ވަބާ ބޮޑުވުމުން، ސަމިޓްގެ މަގުސަދު ހާސިލުވާނެކަމަށް ނުފެންނާތީ ސަމިޓްގައި ބައިވެރި ނުވުމަށް ނިންމާ ކަމަށެވެ.
ދާދި ފަހުން އިންޑިއާގެ ބޮޑުވަޒީރު ނަރެންދުރަ މޯދީ ވިދާޅުވީ ބައިނަލްއަގްވާމީ ދުނިޔެއިން ޕާކިސްތާން އެކަހެރި ކުރުމުގެ މަސައްކަތް އިންޑިއާއިން ކުރިއަށް ގެންދާނެ ކަމަށެވެ.