ޗައިނާއާ ރާއްޖެއާ ދެމެދު އޮތީ ނިމުމެއް ނެތް އަގު ނުކުރެވޭނެ ގާތް ގުޅުމެއް ކަމަށާއި، އިބްރާހިމް ނާސިރް އިންޓަނޭޝަނަލް އެއާޕޯޓް ތަރައްގީ ކުރުމުގެ ބިޔަ މަޝްރޫ އާއި ހުޅުލެ އާއިމާލެ ގުޅުވައިލާ "ޗައިނާ މޯލްޑިވްސް ފްރެންޑްޝިޕް ބްރިޖް"ގެ އުންމީދީ ޕްރޮޖްކެޓްތައް އެއީ ދެ ގައުމުގެ ގުޅުމުގެ ދާއިމީ ރަމްޒުތައް ކަމަށް ފޮރިން މިނިސްޓްރީ މިވަގުތު ހިންގުމާ ހަވާލުވެގެން ހުންނެވި ޔޫތު މިނިސްޓަރު އިރުތިޝާމް އާދަމް ވިދާޅުވެއްޖެ އެވެ.
ޗައިނާގެ 67 ވަަނަ ގައުމީ ދުވަސް ފާހަގަ ކުރުމަށް މިރޭ ހޮޓެލް ޖެންގައި ބޭއްވި ރަސްމިއްޔާތު ޝަރަފުވެރި ކޮށްދެއްވައި ވާހަކަފުޅު ދައްކަވަމުން އެކަމަނާ ވިދާޅުވީ، ޗައިނާ އަކީ ރާއްޖޭގެ އެކި ދާއިރާތަކުގެ ތަރައްގީއަށް އަގު ނުކުރެވޭ މުހިއްމު މަސައްކަތްތަކެއް ކޮށްދީފައިވާ އަދ ހުއްޓުމެއް ނެތި ރާއްޖެއަށް އެހީތެރިވެދޭ "ވަރަށް ގާތް އެކުވެރިއެއް" ކަމަށެވެ. ޗައިނާ އާ ރާއްޖޭގެ ގުޅުމަށް ގިނަ އަހަރުތަކެއް ވެފައިވާއިރު، ދެގައުމުގެ ގުޅުމުގެ ހަރުދަނާކަން ސާބިތުކޮށްދޭ ގިނަ ހެކިތަކެއް ފެންނަން އެބަހުރި ކަމަށް ވެސް އެކަމަނާ ވިދާޅުވި އެވެ.
މީގެ އިތުރުން ޗައިނާއިން ރާއްޖޭގައި ހިންގާފައިވާ ހައުސިން ޕްރޮޖެކްޓްތަކާއި ނެޝަނަލް މިއުޒިއަމް އިމާރާތާއި، ފޮރިން މިނިސްޓްރީ ހުރި އިމާރާތާރް ފަދަ ތަންތަނަކީ ޗައިނާއާ ރާއްޖޭގެ ގުޅުމުގެ ވަރުގަދަ ކަންދައްކުވައިދޭ ތަންތަން ކަމަށާއި ދެގައުމުގެ ރަސްމީ ގުޅުމަށްވީ 44 އަހަރަކީ ރާއްޖެއަށް ގިނަ ގޮތްގޮތުން މަންފާ ލިބިދީފައިވާ އަހަރުތަކެއް ކަމަށެވެ.
ރާއްޖޭގެ އިންފްރާސްޓްރަކްޗާގެ ތަރައްގީއަށް ޗައިނާއިން ކޮށްދޭ ބައެއް މަސައްކަތްތަކަށް ވެސް އެކަމަނާ އަލިއަޅުވައިލެއްވި އެވެ. އަދި ވިދާޅުވީ ރާއްޖެއިން އަބަދުވެސް މަސއްކަތް ކުރާނީ ޗައިނާއާ އެކުގައި ކަމަށާއި، ބައިނަލް އަގުވާމީ މަސްރަހުގައި ޗައިނާއާ ގުޅިގެން މަސައްކަތްކުރާ ގައުމެއްގެ ގޮތުގައި ރާއްޖެ އަބަދުވެސް ދެމި އޮންނާނެ ކަމަށެވެ.
ޗައިނާއާ ރާއްޖޭގެ ސަރުކާރުން އެކުލަވާލުމަށް މަސައްކަތްކުރަމުންދާ ފްރީ ޓްރޭޑް އެއްބަސްވުމަށް އިޝާރާތް ކުރައްވަމުން މިނިސްޓަރު ވިދާޅުވީ، އެ އެއްބަސްވުމާއެކު ރާއްޖެއާއެކު ޗައިނާއިން ގާއިމްކޮށްފައިވާ ޒަމާންވީ އިގްތިސޯދީ ގުޅުމަށް އިތުރު އާރޯކަން ލިބިގެންދާނެ ކަމަށާއި އެ އެއްބަސްވުމުގެ ސަބަބުން ރާއްޖެއަށް އަންނަ އިންވެސްޓްމަންޓްތައް އިތުރުވެ ދެގައުމުގެ ދެމެދުގައި އިގްތިސޯދީ ނަފާ އެތައް ގުނައަކަށް އިތުރުވެގެންދާނެ ކަމަށެވެ.
"ރާއްޖެއާ ޗައިނާއިން ހިއްސާކުރާ ރަސްމީ، ސަގާފީ، އިގްތިސޯދީ ގުޅުމަކީ ފަނޑުކަމެއް އަންނާނެ ގުޅުމެއް ނޫން. ރާއްޖެއިން އަބަދުވެސް އެ ގުުން ހަރުދަނާ ކުރުމަށް މަސައްކަތްކުރާނެ،" މިނިސްޓަރު ވިދާޅުވި އެވެ.
ސަރުކާރަށް ނިސްބަތްވާ އިސް ބޭފުޅުންނާއި، ސިޔާސީ ޕާޓީތަކުގެ އިސް ބޭފުޅުންނާއި އެހެނިހެން ވެސް އިސް މަގާމްތަކުގައި އުޅުއްވާ އިއްޒަތްތެރިން ބައިވެރިވެވަޑައިގެންނެވި ހަފްލާގައި ރާއްޖޭގައި ހުންނަވާ ޗައިނާގެ ސަފީރު ވަން ފުކަން ވިދާޅުވީ، ޗައިނާ އަކީ ތަރައްގީ ހޯދުމަށް ބުރަ މަސައްކަތްތަކެއް ކުރާ ގައުމެއް ކަމަށެވެ. ހަމައެއާއެކު ޗައިނާ އަކީ ތަރައްގީއަށް ކުރަމުންދާ މަސައްކަތްތަކުގައި ބައިނަލް އަގުވާމީ ގުޅުންތައް ބަދަހި ކުރުމަށް މަސައްކަތްކުރާ އަބަދުވެސް ސުލްހަވެރިކަމަށް ލޯބިކުރާ ގައުމެއް ކަމަށެވެ.
ރާއްޖެ ޗައިނާ ގުޅުމަށް އިޝާރާތްކުރައްވަމުން ސަފީރު ވިދާޅުވީ، ދެ ގައުމުގެ ގުޅުމަކީ ބަދަހި ގުޅުމެއް ކަމަށެވެ. އޭގެ އެންމެ ބޮޑު އެއް ރަމްޒަކީ މިހާރު އަޅަމުންދާ ޗައިނާ މޯލްޑިވްސް ފްރައިންޑްޝިޕް ބްރިޖް ކަމަށާއި ރާއްޖޭގެ އެކި ހިސާބުތަކުގައި ޗައިނާގެ އެހީތެރިކަމާއެކު ކުރިއަށްދާ މަޝްރޫއުތަކުން ދޭހަވަނީ ޗައިނާގެ އިންވެސްޓަރުންގެ މެދުގައި ރާއްޖެ މަގްބޫލުވެފައިވާ މިންވަރު ކަމަށެވެ. އަދި ވިދާޅުވީ ރާއްޖެއަށް އެހީތެރިކަން ފޯރުކޮށްދެވެން ހުރި ހުރިހާ ދާއިރާއަކުން އެހީ ދޭން ޗާއިނާ ތައްޔާރަށް އޮތް ކަމަށެވެ.
މިރޭގެ ހަފްލާގައި މިނސިްޓަރު އިރުތިޝާމް އާއި ޗައިނާގެ އެމްބެސެޑަރު ހަފްލާގެ ކޭކް ފަޅައިދެއްވަނީ. -- އަވަސް ފޮޓޯ: އަހުމަދު ޝުރާއު