އާންމުކޮށް ޚަބަރުތަކުން އަޑު އިވެނީ އެމެރިކާގެ ޑްރޯން ހަމަލާތަކެއްގައި އަފްޣާނިސްތާނު ނުވަތަ ޕާކިސްތާނުގައި އާންމުންތަކެއް މަރުވެގެން އުޅޭ ވާހަކަ އެވެ. ނަމަވެސް މިފަހަރު މި އޮތޯ އިރާގާއި ސީރިއާގައި އަތްގަދަކޮށްގެން އުޅޭ ޓެރަރިސްޓް ޖަމާއަތް އިސްލާމިކް ސްޓޭޓްސް (އައިއެސް) އިން އެމީހުންގެ ހަމަލާތައް "ޑްރޯން" އަށް އަޕްގްރޭޑްކުރި ވާހަކަ އެވެ.
އެކަމަކު އައިއެސް އިން ބޭނުންކުރަނީ އެމެރިކާ އާއި އިޒްރޭލު ފަދަ ބާރުގަދަ އަސްކަރިއްޔާތުން ބޭނުންކުރާ ޒާތުގެ ޑްރޯންތަކެއް ނޫނެވެ. ކޮމާޝަލް ބޭނުންތަކަށް ތަރައްގީކޮށްފައިވާ ޑްރޯންތަކެވެ. އައިއެސް އިން މި ޑްރޯންތައް ބޭނުންކޮށްގެން ހަމަލާ ދެނީ އޭގައި ބޮން ހަރުކޮށް، ބޭނުންވާ މަންޒިލަކަށް ރިމޯޓުގެ އެހީގައި ގެންގޮސް ގޮއްވާލައިގެންނެވެ.
އެގޮތުން މި މަހުގެ ދެ ވަނަ ދުވަހު އައިއެސް އިން މިފަދަ ހަމަލާއެއް އިރާގުގައި ދީފައިވެ އެވެ. އެ ހަމަލާގައި، އިރާގުގެ ސިފައިންގެ ދެ މީހަކު މަރުވެފައިވާއިރު އެމީހުންނާ އެކު ހަރަކާތްތެރިވި ފްރާންސް ސިފައިންގެ ދެ މީހަކު ވަރަށް ބޮޑަށް ޒަހަމްވުމާ ގުޅިގެން ވަނީ އަނބުރާ އެމީހުންގެ ގައުމަށް ފޮނުވާލައިފަ އެވެ.
އައިއެސްއާ ދެކޮޅަށް އެމެރިކާ އިން އިރާގުގައި އެކުލަވާލާފައިވާ ބައިނަލްއަގުވާމީ ލަޝްކަރުގައި ފްރާންސްގެ 500 އެއްހާ ސިފައިން ހަރަކާތްތެރިވެ އެވެ.
