އަފްޣާނިސްތާނުގެ ވެރިރަށް ކާބުލްގައި އާޝޫރާ ދުވަހާ ދިމާކޮށް ޝިއައީންގެ މަގުބަރާއަކަށް އިއްޔެ ދިން ބަޑީގެ ވަރުގަދަ ހަމަލާއެއްގައި 14 މީހަކު މަރާލައިފި އެވެ.
އަފްޣާނިސްތާނުގެ ދާޚިލީ ވުޒާރާއިން ބުނެފައި ވަނީ އިއްޔެގެ ހެނދުނު ވަގުތުގައި ދިން އެ ހަމަލާގައި އަފްޣާނިސްތާނުގެ ސަލާމަތީ ބާރުތަކަށް ނިސްބަތްވާ މީހަކު ވެސް މަރުވެފައިވާ ކަމަށެވެ. ހަމަލާގައި ކުޑަކުއްޖަކު ވެސް މަރުވެފައިވެ އެވެ. މީގެ އިތުރުން 36 މީހަކު ޒަހަމްވެފައިވާއިރު އޭގެ ތެރޭގައި 19 އަންހެނަކު ހިމެނެ އެވެ.
މަގުބަރާ އަށް އަމާޒުކޮށް ދިން ހަމަލާ ހުއްޓުވާލެވުނީ ސަލާމަތީބާރުތަކުން ނުކުމެ ދެ ގަޑިއިރުވަންދެން ހިންގި އަސްކަރީ ހަރަކާތަކަށް ފަހު އެވެ. އެ ކުރިމަތިލުމުގައި ސިފައިން ވަނީ، ހަމަލާ ދިން މީހާ މަރާލާފައިވެ އެވެ.
ނަމަވެސް މި ހަމަލާއެއްގެ ޒިންމާ މިހާތަނަށް އެއްވެސް ހަނގުރާމަވެރި ޖަމާއަތަކުން ނަގާފައެއް ނުވެ އެވެ.
އަފްޣާނިސްތާނުގެ ކާބުލްގައި މިގޮތަށް ހަމަލާ ދިނުމަކީ އާންމު ކަމެކެވެ. އެގޮތުން މިދިޔަ އޯގަސްޓް މަހުގެ 24 ވަނަ ދުވަހު ކާބުލް ޔުނިވާސިޓީ އަށް ދިން ބަޑީގެ ހަމަލާތަކެއްގައި 13 މީހަކު މަރާލާފައިވެ އެވެ.
ކާބުލްގައި ޝިއައީންނާ ދެކޮޅަށް ދިން ހަމަލާގައި ޒަހަމްވި އަންހެނަކަށް ހޮސްޕިޓަލެއްގައި އިއްޔެ ފަރުވާ ދެނީ. --ފޮޓޯ:އޭއެފްޕީ