ވޮޝިންޓަން (13 އޮކްޓޯބަރު) - ސީރިއާގެ ދާޚިލީ ހަނގުރާމައިގެ މައްސަލަ ބޮއްސުންލައިގެން ދިއުމާ ގުޅިގެން މެދުކަނޑާލާފައިވާ މަޝްވަރާގެ ވާހަކަތަކާ އެކު އެނބުރި އައުމަށް އެމެރިކާ އާއި ރަޝިއާ އިން އެއްބަސްވެއްޖެ އެވެ.
އެމެރިކާ އިން މި މަޝްވަރާތަކުން ބޯދަމައިގަތީ، ސީރިއާގެ މައްސަލަ އަށް ސުލްހަވެރި ހައްލެއް ހޯދުމަށް ރަޝިއާ އިން ބޭނުން ނުވާ ކަމަށާއި މައްސަލަ އިތުރަށް ގޯސްކުރަނީ ރަޝިއާ އިން ކަމަށް ތުހުމަތުކޮށެވެ. ހަމަލާތައް ވަރުގަދަވެފައި ވަނިކޮށް އެމެރިކާ އިން މަޝްވަރާތައް ހުއްޓާލީ މީގެ ނުވަ ދުވަސްކުރިންނެވެ.
އަލުން މަޝްވަރާތައް ފެށުމަށް އެމެރިކާ އާއި ރަޝިއާ އިން އެއްބަސްވެފައިވާއިރު ސީރިއާގެ އެންމެ ހަމަނުޖެހުން ބޮޑު ހަލަބު ސިޓީގައި އަލުން ހަމަލާތައް ބަދަލުކުރަން ފަށައި ފާއިތުވި ދެ ދުވަހުގެ ހަމަލާތަކުގައި 75 މީހަކު މަރާލާފައިވެ އެވެ.
ސީރިއާގެ ދާހިލީ މައްސަލަ އަށް ހައްލެއް ހޯދުމަށް ރަޝިއާ އާއި އެމެރިކާ އިން އިސް ރޯލެއް އަދާކުރާއިރު ރަޝިއާ އަކީ ސީރިއާގެ ރައީސް ބައްޝާރުލް އަސަދުގެ ވެރިކަމުގެ ދިފާއުގައި ނުކުމެފައިވާ ބާރެކެވެ. އެމެރިކާ އަކީ އަސަދުގެ ވެރިކަން ނިމުމަކަށް ގެންނަން މަސައްކަތްކުރާ ސީރިއާގެ އިދިކޮޅު ހަނގުރާމަވެރިންނަށް ތާއީދުކުރާ ގައުމެކެވެ.
އެމެރިކާ އާއި ރަޝިއާގެ އިތުރުން ސީރިއާގެ ސުލްހައިގެ މަޝްވަރާތަކުގައި ސައޫދީ އަރަބިއްޔާ އާއި ތުރުކީ އާއި އީރާނުން ވެސް ބައިވެރިވާނެ އެވެ. ވާހަކަތަކުގައި އިސް މަންދޫބުންގެ ގޮތުގައި ބައިވެރިވެ ވަޑައިގަންނަވާނީ އެމެރިކާގެ ޚާރިޖީ ވަޒީރު ޖޯން ކެރީ އާއި ރަޝިއާގެ ޚާރިޖީ ވަޒީރު ސަރްގޭ ލަވްރޯވް އެވެ.
ސީރިއާގެ ދާޚިލީ ހަނގުރާމައިގެ ސަބަބުން އެގައުމުގެ ހަލަބު ސިޓީގައި ސުންނާފަތިވެފައިވާ ސަރަހައްދެއް. --ފޮޓޯ: ރޮއިޓާސް