ތުލުސްދޫ ދާއިރާގެ މެމްބަރު މުހައްމަދު ވަހީދު އިބްރާހީމާއި (ވައްޑޭ)، އިބްރާހީމް ޝުޖާއު ޕީޕީއެމްގެ ސުލޫކީ ކޮމެޓީއަށް ހާޒިރުވާން އަންގައިފި އެވެ.
ސުލޫކީ ކޮމެޓީން މިއަދުވަނީ އެ މައްސަލަ ކުރިއަށް ގެންދިއުމަށް ޕާޓީގެ ގަވާއިދުގައިވާ ގޮތުން މައްސަލަ ރައްދުވާ ފަރާތުން ބޭނުން ދެ މެމްބަރަކާއެކު ކޮމެޓީއަށް ހާޒިރުވާން އަންގާ ސިޓީ ފޮނުވާފަ އެވެ.
ޝުޖާއު އަށް ފޮނުވި ސިޓީގައި ބުނެފައިވަނީ ޝުޖާއުގެ ފަރާތުން ދެ މެމްބަރުންނާއެކު މާދަމާ ހަވީރު ހަތަރުގަޑި ބަޔަށް ކޮމެޓީއަށް ހާޒިރުވުމަށެވެ. އަދި ވައްޑެއަށް ފޮނުވި ސިޓީގައި ބުނެފައިވަނީ ވައްޑެގެ ފަރާތުން ދެ މެމްބަރުންނާއެކު މާދަމާ ހަވީރު ފަސް ގަޑި ބަޔަށް ކޮމެޓީއަށް ހާޒިރު ވުމަށެވެ. އަދި ކޮމެޓީއަށް ހާޒިރު ނުވެއްޖެނަމަ ޣައިރު ހާޒިރުގައި މައްސަލަ ބަލާނެ ކަމަށެވެ.
ޝުޖާއު އަދި ވައްޑެއަށް ސުލޫކީ ކޮމެޓީއަށް ހާޒިރުވާން އަންގާފައިވަނީ ރައްޔިތުންގެ މަޖިލީހުގެ މިއަދުގެ ޖަލްސާގައި، ކޮމަންވެލްތުން ރާއްޖެ ވަކިވުމަށް މަޖިލީހުން ގޮތެއް ނިންމުމަށް ވޯޓުލާން ހުޅުވާލި ފުރުސަތުގައި އެއާ ދެކޮޅަށް ވޯޓުލާފައި ވަނިކޮށެވެ. ނަމަވެސް 39 މެމްބަރުންގެ އަގުލަބިއްޔަތުން ވަނީ ރާއްޖެ ކޮމަންވެލްތުން ވަކިވާން ފާސްކޮށްފަ އެވެ.