ފަސްޓް ލޭޑީގެ މަންމާފުޅު އަވަހާރަވެއްޖެ، ކަށު ނަމާދު ފަތިސް ނަމާދަށް ފަހު

ރައީސުލް ޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމްގެ އަނބިކަނބަލުން، ފަސްޓް ލޭޑީ މެޑަމް ފާތުމަތު އިބްރާހިމްގެ މަންމާފުޅު، ގ. ރޯޒަރީ އައިޝަތު މޫސާ އުމުރުފުޅުން 80 އަހަރުގައި މިރޭ އަވަހާރަވެއްޖެ އެވެ.

އެކަމަނާ މިރޭ އަވަހާރަވީ އައިޖީއެމްއެޗްގައި ފަރުވާ ހޯއްދަވަނިކޮށެވެ. އެކަމަނާ އަވަހާރަވީ އަލާސްކަންފުޅަށް އެ ހޮސްޕިޓަލްގައި ފަރުވާ ހޯއްދަވާތާ ދުވަސްތަކެއްވީ ފަހުންނެވެ.

އެކަމަނާގެ މޫނު ދެއްކުން މިރޭ މެންދަމު، 1:00 އާއި 3:00 އާ ދެމެދު އާސަހަރާގައި އޮންނާނެ އެވެ. އަދި ކަށު ނަމާދު ކުރުން އޮންނާނީ މިރޭ ފަތިސް ނަމާދަށް ފަހު އިސްލާމީ މަރުކަޒުގަ އެވެ.

ވީހާ ވެސް ގިނަ ބަޔަކު މަންމާފުޅުގެ ޖަނާޒާގައި ބައިވެރިވުމަކީ ފަސްޓްލޭޑީ، މެޑަމް ފާތިމަތު އިބްރާހިމްގެ ވަރަށް ބޮޑު އެދިލެއްވުމެކެވެ.