ވޮޝިންޓަން (15 ނޮވެމްބަރު) - އެމެރިކާގެ ރައީސް ކަމަށް އިންތިހާބުކޮށްފައިވާ ރިޕަބްލިކަން ޕާޓީގެ، ޑޮނަލްޑް ޓްރަމްޕަށް ވެރިކަން ކުރުމުގެ ފުރުސަތު ތަނަވަސްކޮށްދޭން ޖެހޭނެ ކަމަށާއި އެބޭފުޅާގެ ވެރިކަމަށް ވަގުތު ދޭން ޖެހޭނެ ކަމަށް، ދައުރު ނިންމަވާލެއްވުމަށް ތައްޔާރުވެ ވަޑައިގަންނަވަމުން ގެންދަވާ އެމެރިކާގެ ރައީސް ބަރަކް އޮބާމާ އިއްޔެ ވިދާޅުވެއްޖެ އެވެ.
އެމެރިކާ އާއި މުޅި ދުނިޔެ ވެސް ސިއްސުވާލި ފޯރި ގަދަ ރިއާސީ އިންތިހާބަށް ފަހު ދެއްވި ފުރަތަމަ ނިއުސް ކޮންފަރެންސްގައި ވާހަކަ ދައްކަވަމުން އޮބާމާ ވިދާޅުވީ ރައީސް ކަމަށް އިންތިހާބުކުރެވުނު ފުރަތަމަ އަހަރު އެ ބޭފުޅާ އަށް ވެސް ވަގުތު ބޭނުންވި ކަމަށާއި ސިޔާސަތުތަކާ އެކު ވެރިކަމުގައި ހަމަޖެހިލެއްވުމަށް ޓްރަމްޕަށް ވެސް އެ ވަގުތު ބޭނުންވާނެ ކަމަށެވެ. އެ ވަގުތު ޓްރަމްޕަށް ދޭން ޖެހޭނެ ކަމަށް ވިދާޅުވެ ވާހަކަ ދެއްކެވިއިރު، ނިމިގެން ދިޔަ ޑިމޮކްރޭޓުންގެ ކެމްޕޭނުގައި ޓްރަމްޕަށް އަމާޒުކޮށް ވިދާޅުވި އެއްވެސް ފާޑުކިޔުމެއް އޮބާމާ ތަކުރާރެއް ނުކުރައްވަ އެވެ.
ޓްރަމްޕަކީ އެމެރިކާގެ ރައްޔިތުންގެ ރައީސަކަށް ކުފޫ ހަމަވާ ބޭފުޅެއް ނޫން ކަމަށް ކުރިން ވިދާޅުވި ނަމަވެސް އޮބާމާ އިއްޔެ ވިދާޅުވީ، ވައިޓް ހައުސްގައި ޓްރަމްޕާ އެކު ކުރިއަށް ގެންދެވި ބައްދަލުވުމަކީ ޓްރަމްޕްގެ އިހްލާސްތެރިކަން ދެނެގަނެވުނު ބައްދަލުވުމެއް ކަމަށާއި އެމެރިކާގެ ހުރިހާ ރައްޔިތުންގެ ރައީސަކަށް ވެވަޑައިގަތުމަށް ޓްރަމްޕް ތައްޔާރަށް ހުންނެވިކަން އެނގިވަޑައިގެންނެވި ކަމަށެވެ.
އޮބާމާ ވިދާޅުވެފައި ވަނީ ޓްރަމްޕަކީ ވަކި ބައެއްގެ ފިކުރުތަކެއް ހިއްޕަވައިގެން ވެރިކަމަށް ވަޑައިގަތުމުގެ ވިސްނުން ގެންގުޅުއްވާ ލީޑަރެއް ކަމަށް ގަބޫލުނުކުރައްވާ ކަމަށެވެ. އަދި ޓްރަމްޕާ އެކު މަސައްކަތްކުރަން ރަނގަޅު ޓީމެއް ވެސް އޭނާއާ އެކު އެބައޮތް ކަމަށް އޮބާމާ ވިދާޅުވި އެވެ.
މި މޭރުމުން ވާހަކަ ދެއްކެވި ނަމަވެސް އޮބާމާ ވިދާޅުވެފައި ވަނީ ޓްރަމްޕާއި އެ ބޭފުޅާއާ ދެމެދު ހިޔާލުތަފާތުވާ އެތައް ކަމެއް އެބަހުރި ކަމަށެވެ.
"އެހެން ނަމަވެސް އަޅުގަނޑަށް ހީވަނީ އެ ބޭފުޅާގެ ސިޔާސަތުތައް ތަންފީޒުކުރުމަށް ރައްޔިތުން ފުރުސަތު ދޭން ޖެހޭނެހެން. އެއަށް ފަހު އެމެރިކާގެ ރައްޔިތުން ނިންމާނީ އެ މީހުންނަށް ދައްކުވައިދޭ މަންޒަރު އެމީހުންނަށް ކަމުދޭތޯ،" އޮބާމާ ވިދާޅުވި އެވެ.
އޮބާމާ ވިދާޅުވެފައި ވަނީ ޓްރަމްޕްގެ ހުރިހާ ސިޔާސަތުތަކެއް ތަންފީޒުކުރުން ފަސޭހަ ކަމަކަށް ނުވާނެ ކަމަށާއި ބައެއް ސިޔާސަތުތައް ބަދަލުކުރެއްވުމަށް މަޖުބޫރުވެ ވަޑައިގަންނަވާނެ ކަމަށެވެ. --ސީއެންއެން