އިންޑޮނީޝިއާގެ ވެރިރަށް ޖަކާޓާގެ ގަވަރުނަރު، ބަސޫކީ ޖާހާޖާ ޕޫނާމާ ގުރުއާނަށް ހަޖޫ ޖަހައި އިސްލާމް ދީނަށް ފުރައްސާރަ ކުރެއްވި މައްސަލައެއް އެގައުމުގެ ފުލުހުން ތަހުގީގުކުރަން ފަށައިފި އެވެ.
އަހޯކްގެ ނަމުން އިންޑޮނީޝިއާ އަށް މަޝްހޫރުވެފައިވާ މި ގަވަރުނަރަކީ ޗައިނާ ދަރިކޮޅަށް ނިސްބަތްވާ ނަސޯރާއެކެވެ. އަދި ޖަކާޓާގައި ގަވަރުނަރުކަމަށް އިންތިހާބުކުރެވުނު ފުރަތަމަ މުސްލިމު ނޫން ފުރަތަމަ ގަވަރުނަރު ވެސްމެ އެވެ.
މި ބޭފުޅާ ގުރުއާނަށް ހަޖޫ ޖައްސަވައި، ދީނަށް ފުރައްސާރަ ކުރައްވާފައި ވަނީ ދެ ވަނަ ދައުރަކަށް އިންތިހާބުވެ ވަޑައިގަތުމަށް މިހާރު ކުރިއަށް ގެންދަވާ ކެމްޕޭންގެ ތެރެއިން އެއްވުމެއްގައި ކަމަށް ފުލުހުން ތުހުމަތުކުރެ އެވެ. އިސްލާމް ދީނާއި އަގީދާ އަށް އަމާޒުވާ ގޮތަށް ފުރައްސާރަކުރުމުގެ ތުހުމަތު އަހޯކްގެ މައްޗަށް އުފުލާފައިވާއިރު މި މައްސަލަ ސާބިތުވެއްޖެ ނަމަ އޭނާގެ މައްޗަށް ފަސް އަހަރުގެ ޖަލު ހުކުމެއް އައުމުގެ ފުރުސަތު ބޮޑެވެ.
އިންޑޮނީޝިއާގެ ފުލުހުން މިހާރު ކުރިއަށް ގެންދާ ތަހުގީގާ ގުޅިގެން އަހޯކަށް ވަނީ ގައުމުން ފުރާ ވަޑައިގަތުމުން ވެސް މަނާކޮށްފަ އެވެ.
ކެމްޕޭން އެއްވުމެއްގައި ގުރުއާނަށް ހަޖޫ ޖެއްސެވި ކަމަށް ބުނާ މައްސަލައެއްގައި އަހޯކްގެ މައްސަލަ ފުލުހުންނަށް ރިޕޯޓްކޮށްފައި ވަނީ އޭނާއާ ދެކޮޅަށް މުޒާހަރާކުރި އިސްލާމިކް ގްރޫޕަކުންނެވެ. މައްސަލަ ހޫނުވެގެން، ގަވަރުނަރު ފަހުން މައާފަށް ވެސް އެދިވަޑައިގެންފައިވެ އެވެ.
އަހޯކްގެ އިސްތިއުފާ އަށް ގޮވާލައި ޖަކާޓާގައި މި މަހުގެ ކުރީކޮޅު ވަރުގަދަ މުޒާހަރާއެއް ވެސް އިސްލާމިކް ގްރޫޕްތަކުން ކުރިއަށް ގެންގޮސްފައިވެ އެވެ. ގާތްގަނޑަކަށް ލައްކައަކަށް ވުރެ ގިނަ މީހުން އެ މުޒާހަރާތަކުގައި ބައިވެރިވި އެވެ.
ފާޑުކިޔުންތަކާ އެކު ވެސް އަހޯކްގެ މަގްބޫލުކަން އޭނާ ދަމަހައްޓަމުން ދަނީ ކޮރަޕްޝަނާއި ސިޔާސީ ޒަމާނީ އިސްލާހުތައް ކުރިއަށް ނެރުއްވައިގެންނެވެ.
އިންޑޮނީޝިއާގެ 250 މިލިއަން މީހުންގެ ބޮޑު އާބާދީގައި ޗައިނާ ދަރިކޮޅުގެ ނިސްބަތަކީ ގާތްގަނޑަކަށް އެންމެ ޕަސެންޓެކެވެ. --ބީބީސީ