އިންޑިއާ އާއި ޕާކިސްތާނާ ދެމެދު މިލްކުވެރިކަމުގެ މައްސަލާގައި ހިޔާލުތަފާތުވެފައި އޮންނަ ކަޝްމީރުގައި ދެ ގައުމުގެ ސިފައިންގެ ކުރިމަތިލުންތަކެއް ހިނގަމުން އަންނައިރު އާންމުންނަށް ވަނީ އެހެން ބިރުވެރިކަމެއް ވެސް ކުރިމަތިވެފަ އެވެ. ކަޝްމީރުގައި އިންޑިއާ އިން ކޮންޓްރޯލް ކުރާ ސަރަހައްދަށް ނިސްބަތްވާ އަވަށްތަކުގައި ހުރި ސްކޫލްތައް އަނދައި އަޅިއަށް ވަނީ އެވެ.
ފާއިތުވި ތިން މަސް ދުވަސް ތެރޭގައި އިންޑިއާގެ ކަޝްމީރުގައި 26 ސްކޫލެއްގައި ރޯކޮށް، އެއްކޮށް އަންދާލާފައިވާއިރު އަވަށްތަކުގައި ދިރިއުޅޭ ކުދިން މިހާރު ކިޔަވަން ދާނެ ސްކޫލެއް ނެތެވެ. އޮފިޝަލުން ވިދާޅުވެފައި ވަނީ ސްކޫލްތަކުގައި ހުޅުޖެހުމާ ގުޅިގެން އޭގެ ނޭދެވޭ އަސަރުކޮށްފައިވާ ދަރިވަރުންގެ އަދަދު 4000 އަށް އަރާ ކަމަށާއި މިއީ 750،000 އެމެރިކާ ޑޮލަރުގެ ގެއްލުން ލިބިފައިވާ ކަމެއް ކަމަށެވެ.
ފުލުހުން މި މައްސަލައެއް ތަހުގީގުކުރަމުން އަންނައިރު ސްކޫލްތައް އަންދާލުމުގެ ޒިންމާ މިހާތަނަށް އެއްވެސް ބަޔަކު ނަގާފައެއް ނުވެ އެވެ. އަނެއްކޮޅުން މި މައްސަލައިގެ އިތުރު އެއްވެސް ތަފްސީލެއް އާންމުކުރަން އިންޑިއާގެ ފުލުހުން ބޭނުމެއް ނުވެ އެވެ.
ކަޝްމީރުގެ އިންޑިއާވީ ފަޅީގައި ސްކޫލްތަކުގައި ހުޅުޖެހުމުގެ "އަނިޔާވެރިކަމެއް" ފެށިފައިވާއިރު އެ ސަރަހައްދުގައި ދިރިއުޅޭ އާންމުން އިންޑިއާގެ ބާރުތަކާ ދެކޮޅަށް ސިލްސިލާ މުޒާހަރާތަކެއް ކުރިއަށް ގެންދާތާ މިހާރު ހަތަރު މަސްވެއްޖެ އެވެ. މައްސަަލަ ހޫނުވެފައި ވަނީ އިންޑިއާ ސިފައިންގެ ހަމަލާއެއްގައި ކަޝްމީރުގެ ހަނގުރާމަވެރިޔަކު މަރާލުމުންނެވެ.
އެއަށް ފަހު އިންޑިއާގެ ސަލާމަތީ ބާރުތަކާ ދެކޮޅަށް ކުރިއަށް ގެންދާ މުޒާހަރާތަކުގައި މިހާތަނަށް 90 މީހަކު މަރުވެފައިވާއިރު މިއީ އިންޑިއާގެ ކަޝްމީރުގައި އިންޑިއާ ސަރުކާރާ ދެކޮޅަށް ފާއިތުވި ވިއްސަކަށް އަހަރު ފެނިގެންދާ އެންމެ ބޮޑު ހަމަނުޖެހުމެވެ. -- އަލް ޖަޒީރާ