އިޒްރޭލަށް މިހާރު ވަޑައިގެން އުޅުއްވާ ރަޝިއާގެ ބޮޑުވަޒީރު ޑިމިޓްރީ މެޑްވެޑޭވަށް އިޒްރޭލުގެ އެގްރިކަލްޗާ މިނިސްޓަރު ޔޫރީ އޭރިއަލް ޑްރޯންއެއް ހަދިޔާކުރެއްވި މައްސަލައެއް ވަރަށް ބޮޑަށް ހޫނުވެ، އެ ޑްރޯން އަނބުރާ އަތުލުމަށް އިޒްްރޭލުން ނިންމައިފި އެވެ.
މި ޑްރޯނެއް މެޑްވެޑޭވަށް ހަދިޔާކުރައްވާފައި ވަނީ އިޒްރޭލުގެ އެގްރިކަލްޗަރަލް ރިސާޗު ސެންޓަރަށް މެޑްވެޑޭވް ކުރެއްވި ޒިޔާރަތެއްގަ އެވެ. ހަދިޔާކުރެއްވި ޑްރޯނަކީ އެ ރިސާޗު ސެންޓަރުގައި ދައްކާލަން ބަހައްޓާފައި ހުރި ޑްރޯނެކެވެ.
ނަމަވެސް 50،000 އެމެރިކާ ޑޮލަރުގެ މި ޑްރޯން މެޑްވެޑޭވަށް ނުދޭ ގޮތަށް ފަހުން ވަނީ ހަމަޖައްސައިފަ އެވެ. އޭގެ ބަދަލުގައި އެހެން ޑްރޯނެއް ދޭނެ ކަމަށް ވެސް ބުނެފައިވެ އެވެ.
ފުރަތަމަ ހަދިޔާކުރި ޑްރޯން ނުދޭން އިޒްރޭލުން ނިންމީ، އެމެރިކާ އިން ރަޝިއާއާ ހިއްސާކުރަން ބޭނުން ނުވާ ޓެކްނޮލޮޖީ އޭގައި ހިމެނިދާނެ ކަމަށް ލަފާކުރެވޭތީ އެވެ. އެ ޑްރޯނަކީ ސްޕެއިންގެ އަލްފާ އަންމޭންޑް ސިސްޓަމް ކުންފުނީގެ އުފެއްދުމަކަށް ވިޔަސް އޭގައި ހިމެނޭ ތާމަލް ކެމެރާ އަކީ އެމެރިކާގެ އުފެއްދުމެކެވެ.