އޭއެފްސީ ކަޕްގެ ގުރޫޕް އީގައި މާދަމާ ހަވީރު މާޒިޔާ ސްޕޯޓްސް އެންޑް ރެކްރިއޭޝަންއާ ދެކޮޅަށް މާލޭގައި ކުޅޭ މެޗަކީ ސިންގަޕޫރުގެ ވޯރިއާސް އަށް ވަރަށް މުހިންމު މެޗެއް ކަމަށް ވޯރިއާސްގެ ކޯޗު އެލެކްސް ވީވާ ބުނެފި އެވެ.
މުބާރާތުގައި ކުޅުނު ފުރަތަމަ މެޗުގައި އިންޑޮނޭޝިއާގެ ޕެރްސިޕޫރާ ޖަޔަޕޫރާ އަތުން އަމިއްލަ ދަނޑުގައި ވޯރިއާސް ބަލިވީ 3-1 އިންނެވެ.
"އަހަރެމެން މި މުބާރާތުގައި ކުޅުނު ފުރަަތަމަ މެޗުން ބަލިވީ. އެހެންކަމުން މި މެޗުގެ މުހިންމުކަން ވަރަށް ބޮޑު،" މެޗުގެ ކުރިން މިއަދު އޮތް ނޫސްވެރިންގެ ބައްދަލުވުމުގައި އެލެކްސް ބުންޏެވެ. "އަހަރެމެންނަށް މި މެޗު ކާމިޔާބުކުރެވިއްޖެ ނަމަ، މުބާރާތުގައި ކުރިއަށް ދިއުމަށް ވަރަށް ބޮޑު ފިޔަވަޅެއް އެޅޭނެ."
މިދިޔަ ސީޒަންގައި ސިންގަޕޫރު ލީގު ކާމިޔާބުކުރި ވޯރިއާސް އަކީ ރާއްޖެ އަށް އާ ޓީމެއް ނޫނެވެ. ކުރިން ސިންގަޕޯ އާމްޑް ފޯސަސް ފުޓްބޯލް ކްލަބްގެ ނަމުގައި ކުޅެމުންދިޔަ ވޯރިއާސްގެ ޓީމުން ވަނީ 2007 ވަނަ އަހަރާއި 2008 ވަނަ އަހަރުގެ އޭއެފްސީ ކަޕްގައި ރާއްޖޭގެ ނިއު ރޭޑިއަންޓާ އެއް ގުރޫޕެއްގައި ވާދަކޮށްފަ އެވެ.
ސިންގަޕޫރު ލީގުގައި މިހާތަނަށް ކުޅުނު ދެ މެޗުން ވެސް މޮޅުވެފައިވާ ވޯރިއާސްގެ މުހިންމު ކުޅުންތެރިންގެ ތެރޭގައި އިންގްލެންޑަށް އުފަން ސިންގަޕޫރުގެ ގައުމީ ޓީމުގެ ޑިފެންޑަރު ޑެރެކް ބެނެޓާއި އާޖެންޓީނާގެ ފޯވަޑް ނިކޮލަސް ވެލޭޒް އާއި އިންގްލެންޑްގެ މިޑްފީލްޑަރު ތޯމަސް ބީޓީ ހިމެނެ އެވެ. ވޯރިއާސްގެ ކޯޗަކީ އިންގްލެންޑްގެ އެލެކް ވީވާ އެވެ.
އެލެކްސް ބުނީ ވޯރިއާސް އިން މެޗަށް ނުކުންނާނީ މާޒިޔާ އަށް ސަމާލުކަން ދީގެން، ރާއްޖޭގެ މޫސުމަށް ވެސް ތައްޔާރުވެގެން ކަމަށެވެ.
"މި މޫސުމުގައި ކުޅޭއިރު، އަހަރެމެން ވިސްނަންޖެހޭނެ. އަހަރެމެން މާބޮޑަށް ޖައްސައިގެން ކުޅެން އުޅެފިއްޔާ 90 މިިނިޓުގައި އަހަރެމެންގެ ކުޅުންތެރިން ބުންވަރު ހިފަހައްޓަން އުނދަގޫވާނެ. އެކަމަށް ވިސްނައިގެން ކުޅޭނީ،" އެލެކްސް ބުންޏެވެ.