އަންނަ ޖެނުއަރީ މަހު ބޭއްވުމަށް ހަމަޖެހިފައިވާ ލޯކަލް ކައުންސިލް އިންތިހާބު ދެ މަހަށް ފަސްކޮށްދިނުމަށް އެދި، ސަރުކާރު ހިންގާ ޕާޓީ، ޕީޕީއެމްއިން ސިވިލް ކޯޓަށް ހުށަހެޅި މައްސަލާގެ ތެރެއަށް ވަނުމަށް އިދިކޮޅު އެމްޑީޕީއިން ހުށަހަޅައިފި އެވެ.
އެމްޑީޕީގެ ސެކްރެޓްރީ ޖެނަރަލް އަނަސް އަބްދުލް ސައްތާރު މިއަދު ވިދާޅުވީ، އެ މައްސަލާގެ ތެރެއަށް މިއަދު ސިވިލް ކޯޓަށް ހުށަހަޅާފައިވާނެ ކަމަށެވެ. އަދި ޖަވާބެއް ނުލިބޭ ކަމަށް ވިދާޅުވި އެވެ.
އަނަސް މިއަދު ވިދާޅުވީ، ކައުންސިލް އިންތިހާބަށް އެމްޑީޕީއިން ގިނަ ތައްޔާރީތަކެއްވެ މިހާރު ވެސް ތައްޔާރުވަމުންދާއިރު އެ އިންތިހާބު ފަސްކޮށްފިނަމަ އެ ޕާޓީއަށް ބޮޑެތި ގެއްލުންތަކެއްވާނެ ކަމަށެވެ. އެއީ އެ ޕާޓީން މިހާރު ވަނީ ޕްރައިމަރީތައް ބާއްވައި ކެނޑިޑޭޓުން ކަނޑައަޅާފަ އެވެ. އަނަސް ވިދާޅުވީ، އެކަމުގެ ސަބަބުން ކެނޑިޑޭޓުންނަށާއި ވޯޓުލާ މީހުންނަށް ވެސް ދަތިވާނެ ކަމަށެވެ.
"އިންތިހާބު ލަސްކޮށްފިނަމަ ރީ ރަޖިސްޓްރޭޝަނަށް ވެސް ކުރި މިހާތަނަށް ކުރި މަސައްކަތްތައް އަލުން ބަލުން ކުރަން ޖެހޭނެ، ކެނޑިޑޭޓުންނަށް ވެސް އިތުރު ބުރަތަކެއް އަންނާނެ ކެމްޕެއިން ކުރުމުގައި ވެސް،" އަނަސް ވިދާޅުވި އެވެ. "ސްކޫލް ބަންދު ދުވަސްކޮޅެއް މިއީ، އެހެންކަން ހުއްޓާ ލަސްވެގެން މިދަނީ އަހަރުގެ މެދު ތެރެއަށް، އެހެންވެ ފަސްވެއްޖެނަމަ ކެނޑިޑޭޓުންނަށް ވެސް ވޯޓުލާ މީހުންނަށް ވެސް ދަތިވާނެ،"
އަނަސް ވިދާޅުވީ، އިންތިހާބުތައް ބޭއްވުމަށް ވަކި މުއްދަތުތަކެއް ގާނޫނުގައި ކަނޑައަޅާފައިވަނިކޮށް އެއާ ހިލާފަށް އިންތިހާބުތައް ފަސްވެގެން ދިޔުމަކީ ބަލައިގަނެވޭނެ ކަމެއް ނޫން ކަމަށެވެ.
ޕީޕީއެމްއިން ސިވިލް ކޯޓަށް މައްސަލަ ވައްދާފައިވަނީ، ޕާޓީ ހިންގުމުގައި ދިމާވި އުނދަގޫތަކެއްގެ ސަބަބުން ކަނޑައެޅިފައިވާ ތާރީހުގައި އިންތިހާބު ބޭއްވުމަށް ވާން ޖެހޭ ތައްޔާރީތައް އެ ޕާޓީއަށް ވެވިފައިނުވާތީ އެވެ.