ހުކުރު ދުވަހު ރާއްޖޭގައި ބޭއްވުމަށް ހަަމަޖެހިފައިވާ އޮލިމްޕިކް ސޮލިޑޭރިޓީ ބައްދަލުވުމުގައި ބައިވެރިވެވަޑައިގަތުމަށް އޮލިމްޕިކް ކައުންސިލް އޮފް އޭޝިއާ (އޯސިއޭ)ގެ ރައީސް ކުވޭތުގެ ޝޭހު އަހުމަދު އަލް ފަހުދު އަލް އަހުމަދު އަލް ސަބާހު މިއަދު މެންދުރު ރާއްޖެ ވަޑައިގެންފި އެވެ.
އޮލިމްޕިކް ސޮލިޑޭރިޓީ ކޮމިޝަން ޗެއާ ކުރައްވާ ޝޭހު ފަހުދަށް މިއަދު މެންދުރު އިބްރާހިމް ނާސިރު އިންޓަނޭޝަނަލް އެއާޕޯޓް އިން މަރުހަބާ ދެންނެވީ ކުޅިވަރާ ބެހޭ ވަޒީރު މުހައްމަދު މަލީހު ޖަމާލާއި އޮލިމްޕިކް ކޮމެޓީގެ ރައީސް މުހައްމަދު ޝާވީދާޢި އޮލިމްޕިކް ކޮމެޓީގެ އެހެން ބައެއް އޮފިޝަލުންނެވެ.
ކުވޭތުގެ ޝާހީ އާއިލާ އަށް ނިސްބަތްވެވަޑައިގަންނަވާ ޝޭހު ފަހުދު މިއަދު މެންދުރު ރައީސް އަބްދުﷲ ޔާމީންއާ ބައްދަލުކުރައްވާނެ އެވެ.
ކުޅިވަރު ކުރިއެރުވުމުގައި މެމްބަރު އެސޯސިއޭޝަންތަކަށް އެހީތެރިކަން ފޯރުކޮށްދިނުމަށް ކަނޑައަޅާފައިވާ އޮލިމްޕިކް ސޮލިޑޭރިޓީ ކޮމިޝަންގެ ބައްދަލުވުން ބ. އަތޮޅުގައި ދާދި ފަހުން ހުޅުވި އަމިއްލަފުށި ރިސޯޓުގަ އެވެ.
އޯސީއޭގެ ރައީސްގެ މަގާމު 1991 ވަނަ އަހަރުން ފެށިގެން އަދާކުރައްވަމުންދާ ޝޭހު ފަހުދު ވަނީ ކުވޭތުގެ ކެބިނެޓްގެ ގިނަ މަގާމުތަކެއް މީގެ ކުރިން އަދާކުރައްވައިފަ އެވެ. އަދި ކުވޭތުގެ ފުޓްބޯލް އެސޯސިއޭޝަންގެ ރައީސް ކަމާއި އޭޝިއަން ހޭންޑްބޯލް ފެޑެރޭޝަންގެ ރައީސްކަން އަދި އިންޓަނޭޝަނަލް ހޭންޑްބޯލް ފެޑެރޭޝަންގެ ނައިބު ރައީސްގެ މަގާމު އަދާކުރައްވައިފަ އެވެ.