މެޗުގެ ދެވަނަ ހާފުގައި ކެޕްޓަން އަސަދުﷲ އަބްދުﷲ އާއި ސްޕެއިންގެ ފޯވަޑް ޕަބްލޯ ރޮޑްރިގޭޒް ޖެހި ދެ ލަނޑާއެކު، އޭއެފްސީ ކަޕްގެ ގުރޫޕް އީގައި މިއަދު ސިންގަޕޫރުގެ ވޯރިއާސް އެފްސީ އަތުން 2-0 އިން މާޒިޔާ ސްޕޯޓްސް އެންޑް ރެކްރިއޭޝަން އަމިއްލަ ދަނޑުގައި މޮޅުވެއްޖެ އެވެ.
މެޗުގެ ދެވަނަ ހާފުގެ ކުރީކޮޅު ޕެނަލްޓީ އޭރިޔާ ތެރެއިން ލިބުނު ބޯޅަ އަމާޒުކޮށްލައި، މާޒިޔާ އަށް ލީޑު ހޯދައިދިނީ މިދިޔަ އަހަރު ހަވީރުން ހޮވި ރާއްޖޭގެ އެންމެ މޮޅު ކުޅުންތެރިއާގެ މަގާމާއި އެންމެ ގިނަަ ލަނޑު ޖެހި ކުޅުންތެރިއާ އަށް ދޭ ރަންބޫޓު ހޯދި އަސަދުﷲ އެވެ.
އަދި މާޒިޔާ އިން މި ސީޒަންގެ އޭއެފްސީ ކަޕްގައި ފުރަތަމަ ތިން ޕޮއިންޓް ކަށަވަރުކުރީ 87 ވަނަ މިނިޓުގައި ޕަބްލޯ ޖެހި ލަނޑުންނެވެ. ހުސެއިން ނިޔާޒް މުހައްމަދު (ބޮކުރީ) ޕެނަލްޓީ އޭރިޔާ ތެރެއަށް ހުރަސްކޮށްލި ބޯޅަ ބޮކުރީ ގޯލަށް އަމާޒުކޮށްލީ ބޮލުންނެވެ.
ސިންގަޕޫރުގެ ލީގު ޗެމްޕިއަން ވޯރިއާސް އިން ވަނީ ފުރަތަމަ ހާފުގައި މާޒިޔާގެ ގޯލަށް ނުރައްކާކޮށްފަ އެވެ. އެ ޓީމުގެ ހުނަރުވެރި އާޖެންޓީނާގެ ފޯވަޑް ނިކޮލާ ވެލޭޒް ފޮނުވާލި ބޯޅައެއް ގޯލުގެ ހުރަސް ދަނޑީގައި ޖެހުނުއިރު، މިޑްފީލްޑަރު ޝިން ޖިޔާއީ ފޮނުވާލި ބާރު ޝޮޓު ވެސް ދިޔައީ ދަނޑި ކައިރިން ބޭރަށެވެ. އެކަމަކު ދެވަނަ ހާފުގައި އެ ޓީމަށް މާޒިޔާގެ ޑިފެންސަށް މާ ބޮޑު ނުރައްކަލެއް ނުކުރެވުނެވެ.
ގުރޫޕް އީގައި މިއަދު އިންޑިއާގެ ބެންގަލޫރު އަތުން 3-1 އިން މޮޅުވެ، ތާވަލްގެ އެއްވަނައިގައި ހަ ޕޮއިންޓާއެކު އޮތީ އިންޑޮނޭޝިއާގެ ޕެރްސިޕޫރާ ޖަޔަޕޫރާ އެވެ. މާޒިޔާ އާއި ބެންގަލޫރަށް ތިން ޕޮއިންޓް ލިބިފައިވާއިރު، މިހާތަނަށް ކުޅުނު ދެ މެޗުން ވެސް ބަލިވެ ތާވަލްގެ ފުލުގައި އޮތީ ވޯރިއާސް އެވެ.
"ފުރަތަމަ މެޗުން ބަލިވީމަ ކުޅުންތެރިން ތިބީ މޯރަލީ ވަަރަށް ދަށްވެފައި. އެކަމަކު މި މެޗުން މޮޅުވުމުން އެކަން ރިކަވާވެއްޖެ،" މެޗަށް ފަހު މާޒިޔާގެ ކޯޗު އަލީ ސުޒޭން ބުންޏެވެ. "ކޮންމެ ގޮތެއް ވިޔަސް ވޯރިއާސް އަށްވުރެ މާޒިޔާ ވަރުގަދަ. ދެން އިއްޔެ އެ ވާހަކަ ބުނީމަ ބައެއް މީހުންނަށް ގަބޫލްކުރަން ދަތިވި. އެކަމަކު އެ ޓީމު ވަރުބަލިވީމާ މާޒިޔާ އަށް އޭގެ ފައިދާ ނެގޭނެ ގޮތަކަށް ނަގާނެ."
ވޯރިއާސްގެ ކޯޗު އެލެކްސް ވީވާ ބުނީ މި މެޗު ކާމިޔާބުކުރެވޭ ފެންވަރުގެ ކުޅުމެއް މި މެޗުގައި އެ ޓީމަށް ނުދެއްކުނު ކަމަށެވެ.
"ކުޅުންތެރިންނަށް ވަރުބަލިވުމުގެ މައްސަލަ ދިމާވި. އެކަމަކު އެއަށްވުރެ ބޮޑަށް ދެވަނަ ހާފުގައި އަހަރެމެންނަށް ބޯޅަ ނުހިފެެހެއްޓޭ. މެޗުން މޮޅުވާ ފެންވަރުގެ ކުޅުމެއް ނުދެއްކުނު،" ވީވާ ބުންޏެވެ.