މިދިޔަ މަހު އޮތް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ އެކްސްޓްރާ އޯޑިނަރީ ކޮންގުރެސްއާ ގުޅޭ ގޮތުން ކްލަބް ވެެލެންސިއާ އިން ފީފާ އަށް ފޮނުވާފައިވާ ސިޓީގައި ހިމަނާފައިވަނީ ދޮގު މައުލޫމާތުތަކެއް ކަމަށާއި އެ ސިޓީގެ މައްސަލައިގައި ކްލަބު ވެލެންސިއާ އިން މާފަށް ނޭދިއްޖެ ނަމަ ޑިސިޕްލިނަރީ ފިޔަވަޅު އަޅާނެ ކަމުގެ އިންޒާރު އެފްއޭއެމް އިން ދީފި އެވެ.
އެފްއޭއެމް އިން ކްލަބް ވެލެންސިއާ އަށް ފޮނުވި ސިޓީއެއްގައި ބުނެފައިވަނީ ފީފާ އަށް ވެލެންސިއާ އިން ފޮނުވި ސިޓީގައި "ފާހަގަ ކޮށްފައިވާ ކަންކަމަކީ އެއްވެސް އަސްލެއްނެތް ދޮގު މަޢްލޫމާތު ތަކެއްގެ މައްޗަށް" ބިނާކޮށް ފާހަގަކޮށްފައިވާ ކަންތައްތަކެއް ކަމަށެވެ.
މި އަހަރަށް އެފްއޭއެމް އިން ކަނޑައަޅާފައިވާ ބަޖެޓަކީ ފީފާގެ ނައިބު ރައީސް އަދި މި އަހަރު ފީފާގެ ރައީސް ކަމަށް ވާދަކުރައްވާ ޖޯޑަންގެ ޕްރިންސް އަލީ ބިން އަބްދުﷲ އަލް ހުސެއިން ދެއްވާ އެހީތެރިކަމާއެކު ކަނޑައެޅި ބަޖެޓޭއް ކަމަށާއި ކުރިއަށް އޮތް ފީފާގެ އިންތިހާބުގައި އެފްއޭއެމް އިން ތާއީދުކުރާނީ ޕްރިންސް އަލީ އަށް ކަމަށް ކޮންގުރެސްގައި އެފްއޭއެމްގެ ނޯމަލައިޒޭޝަން ކޮމެޓީގެ ޗެއަާމަން މުހައްމަދު ޝަވީދު ވިދާޅުވި ކަމަށް ވެލެންސިއާ އިން ފީފާ އަށް ފޮނުވި ސިޓީގައި ބުނެފައިވާކަން އެފްއޭއެމް އިން ވަނީ ބުނެފަ އެވެ. އެއީ މުޅިން ދޮގު ވާހަކައެއްކަން އެފްއޭއެމް އިން ވަނީ ފާހަގަކޮށްފަ އެވެ.
"އަދި، އެކަމުގެ ފަހަތުގައި ފޮރުވިގެންވާ ކަންތައްތަކެއް ވާކަމަށް ފާހަގަކޮށް މިއެސޯސިއޭޝަންގެ ނޯމަލައިޒޭޝަން ކޮމިޓީގެ ޗެއާރމަނާއި، ފީފާގެ ނައިބު ރައީސްގެ މައްޗަށް ކޮރަޕްޝަންގެ އިގިލި ދިއްކޮށް ތިޔަ ކްލަބްގެ ސިޓީގައި ލިޔެފައިވުމަކީ މިއެސޯސިއޭޝަނުން ނުހަނު ހިތާމަކުރާ ކަމެކެވެ. އަދި، ކޮރަޕްޝަންގެ އެފަދަ ބޮޑު ތުޙުމަތެއް މިވަގުތު ފީފާގެ ނައިބު ރައީސްގެ މަޤާމުގައި ހުންނެވި ބޭފުޅެއްގެ ބޮލުގައި އެޅުވުމަކީ މިއެސޯސިއޭޝަނުން އިންތިހާއަށް ކަންބޮޑުވޭ،" އެފްއޭއެމްގެ ސިޓީގައި ބުނެފައިވެ އެވެ.
އެފްއޭއެމްގެ ސިޓީގައި ބުނެފައިވަނީ ފީފާގެ ރައީސް ޖޯސެޕް ބްލެޓާ އާއި ކުރިއަށް އޮތް އޭއެފްސީ އިންތިހާބުގައި ދެވަނަ ދައުރަކަށް ކުރިމަތިލައްވާ އޭއެފްސީގެ ރައީސް ޝޭހު ސަލްމާން ބިން އިބްރާހިމް އަލް ހަލީފާ އަށް ތާއީދުކުރައްވާ ކަމަށް ކޮންގުރެސްގައި ޝާވީދު ވިދާޅުވެފައިވަނިކޮށް، "ތަސްވީރު އޮޅުވާލާ، ފީފާ އަށް މުޅިން އެހެން މަންޒަރެއް ފެންނަ ގޮތަށް، އެދެބޭފުޅުންނަށް މިއެސޯސިއޭޝަނުން ތާއީދު ނުކުރާ ކަމަށް ސިފަވާ މޭރުމުން ތިޔަ ކަލްބްގެ ސިޓީގައި ލިޔެފައިވާ ލިޔުން ވެސް މިއެސޯސިއޭޝަނުން އެންމެ ހަރުކަށި ޢިބާރާތުން ކުށްވެރިކުރާ" ކަމަށެވެ.
"އަދި، މިއެސޯސިއޭޝަންގެ ނޯމަލައިޒޭޝަން ކޮމިޓީގެ ޗެއާރމަންގެ އަބުރު ނިގުޅައިގެން ދިޔުމަށާއި، ފުޓްބޯޅަ ކުރިއަރުވާ ތަރައްޤީ ކުރުމަށް އެމަނިކުފާނު ކުރައްވާ މަސައްކަތްތަކުގެ އިތުބާރު ނެތިކޮށްލުމަށް ތިޔަ ކަލްބުން ތިޔަ ކުރި ފިނޑި ޢަމަލު މިއެސޯސިއޭޝަނުން އެންމެ ހަރުކަށި ޢިބާރާތުން ކުށްވެރި ކުރަން،" އެފްއޭއެމްގެ ސިޓީގައި ބުނެފައިވެ އެވެ.
އެފްއޭއެމްގެ ސިޓީގައި ބުނެފައިވަނީ މިއަދުން ފެށިގެން ތިން ދުވަހުގެ ތެރޭގައި ވެލެންސިއާ އިން އެފްއޭއެމްގެ ކިބައިން މާފަށް އެދި ސިޓީއެއް ފޮނުވަން ޖެހޭނެ ކަމަށް ވެލެންސިއާ އިން ފީފާ އަށް ފޮނުވި ސިޓީއާ ގުޅޭގޮތުން ނޯމަލައިޒޭޝަން ކޮމެޓީން ބޭއްވި ބައްދަލުވުމުގައި ނޯމަލައިޒޭޝަން ކޮމެޓީގެ މެމްބަރުންގެ އަގުލަބިއްޔަތުން ނިންމާފައިވާ ކަމަށެވެ. އަދި ތިން ދުވަހުގެ ތެރޭގައި ސިޓީ ނުފޮނުވައިފި ނަމަ، ވެލެންސިއާގެ މައްސަލަ ޑިސިޕްލިނަރީ ކޮމެޓީ އަށް ފޮނުވާނެ ކަމުގެ އިންޒާރު އެފްއޭއެމް އިން ވަނީ ދީފަ އެވެ.