ނިއު ރޭޑިއަންޓްގެ ކޯޗަކަށް ބުރުނާއީ ގައުމީ ޓީމުގެ ކުރީގެ ކޯޗު ބޮސްނިއާގެ އާމިރު އަލަޖިކް ހަމަޖައްސައިފި އެވެ.
އަލަޖިކް ވަނީ އޭޝިއާ ސަރަހަައްދުގައި ކޯޗެއްގެ ގޮތުގއަި ގިނަ ތަޖުރިބާތައް ހޯދައިފަ އެވެ. އެގޮތުން ބުރުނާއީގެ އެންމެ މަޝްހޫރު ކްލަބު ކަމަށްވާ ޑީޕީއެމްއެމް އަށް ކޯޗުކޮށްދިނުމަށް ފަހު، އޭނާ ވަނީ ބުރުނާއީގެ ގައުމީ ޓީމަށް ވެސް ކޯޗުކޮށްދީފަ އެވެ. މީގެ އިތުރުން އިންޑިއާގެ އީސްޓް ބެންގާލް އާއި އޮމާންގެ ސޮހާރު އަދި ކުވޭތުގެ އަލް ނަސްރު އަށް ވެސް އަލަޖިކް ވަނީ ކޯޗުކޮށްދީފަ އެވެ.
އަލަޖިކް ވަނީ ބޮސްނިއާގެ 19 އަހަރުން ދަށުގެ ޓީމާއި ޖަރުމަންގެ މަޝްހޫރު ކްލަބެއް ކަމަށްވާ ވާޑާ ބްރޭމަންގައި ވެސް މަސައްކަތްކޮށްފަ އެވެ.
ނިއު އިން ބުނީ ނިއުއާ ހަވާލުވުމަށް އަލަޖިކް މާދަމާ މާލެ އަންނާނެ ކަމަށެވެ. އަދި ރަސްމީކޮށް އޭނާ ޓީމާ ހަވާލުވާނީ ހުކުރު ދުވަހުން ފެށިގެން ކަމަށެވެ. އަލަޖިކްގެ ކޯޗުކަމުގެ ދަށުން ނިއު ކުޅޭ ފުރަތަމަ މެޗަކަށް ވާނީ އޭއެފްސީ ކަޕްގައި މި މަހުގެ 18 ވަނަ ދުވަހު މިޔަންމާގެ އަޔަވާދީ ޔުނައިޓެޑްއާ ދެކޮޅަށް ނިއު އަމިއްލަ ދަނޑުގައި ކުޅޭ މެޗެވެ.
ނިއު އިން އަލަޖިކްއާ ކޯޗުކަން މި ހަވާލުކުރީ މިދިޔަ އަހަރު އެ ޓީމަށް ދިރާގު ދިވެހި ލީގާއި ޕްރެޒިޑެންޓްސް ކަޕް ކާމިޔާބުކޮށްދިން ފިންލެންްޑްގެ މިކާ ލޮންސްޓްރޮމް މަގާމުން ވަކިކުރުމަށް ފަހު އެވެ. މިކާ މަގާމުން ވަކިކުރީ މި ސީޒަންގައި މިހާތަނަށް ނިއު އިން ނެރިފައިވާ ނަތީޖާތައް ދަށްވުމުންނެވެ.
އޭއެފްސީ ކަޕްގައި މިއަދު ލާއޮސްގެ ލާއޯ އެފްސީއާ ދެކޮޅަށް ނިއު ކުޅޭ މެޗުގައި އެ ޓީމަށް އިރުޝާދު ދޭނީ ވަގުތީ ގޮތުން ޓީމުގެ ކޯޗުކަން ހަވާލުކޮށްފައިވާ ގައުމީ ޓީމުގެ ކުރީގެ ޑިފެންޑަރު ސޮބާހު މުހައްމަދެވެ.