އެންވިޝަން އެންޓަޓެއިންމަންޓްގެ އާ ފިލްމު "ބައިވެރިޔާ" ރޭ އޮލިމްޕަހުގައި ޕްރިމިއާކުރިއިރު މި ފިލްމު މި ވަނީ އޭގެ އަތަލު ޝޯއާ އެކު ބެލުންތެރިންގެ ހިތް އަތުލައިގަނެފަ އެވެ.
ބެލުންތެރިންގެ ބައިވެރިޔަކަށް "ބައިވެރިޔާ" ފިލްމު ވެގެން ގޮސްފައިވާއިރު ފުރަތަމަ ޝޯގެ ކާމިޔާބީ އަށް ފަހު ފިލްމުގެ ޓިކެޓް ވިޔަފާރީގެ ފޯރި ވެސް ކުއްލިއަކަށް ގަދަވެފައިވާ ކަމަށް ޕްރޮޑަކްޝަން ޓީމުން ބުނެފައިވެ އެވެ. މި ފިލްމަކީ ޔޫސުފް ޝަފީއު (ޔޫއްޕެ) ލިޔެ ޑައިރެކްޓްކޮށް މަޝްހޫރު ގިނަ އެހެން ތަރިންތަކަކާ އެކު ލީޑް ރޯލު ވެސް ކުޅެފައިވާ "ސީރިއަސް ކޮމެޑީ" އެކެވެ.
ޔޫއްޕެ އާއި ޝީލާ ނަޖީބު އަދި ޒުވާން ބަތަލާ މަލީހާ ވަހީދު އާއި މަޝްހޫރު އެކްޓަރު އަހުމަދު އަޒްމީލް ފަދަ ތަރިން މުހިންމު ރޯލުތައް ކުޅެފައިވާ މި ފިލްމުގައި ދައްކުވައި ދެނީ ތިން އެކުވެރިއެއްގެ ހަޔާތުގައި ދިމާވާ ހެއްވާ މަޖާ ކަންތައްތަކެވެ. ރޭ ފިލްމު ބެލި މީހުންގެ ތެރެއިން އެންމެ ގިނަ ބަޔަކަށް ކަމުދިޔަނީ ޔޫއްޕެ އާއި ޝީލާގެ ޕާފޯމެންސެވެ.
ނަމަވެސް ހުރިހާ ބެލުންތެރިން ވެސް ވަނީ ފިލްމަށް ޖުމްލަ ގޮތެއްގައި ތައުރީފުކޮށްފަ އެވެ. އަދި ބައެއް ބެލުންތެރިން ބުނާ ގޮތުން ނަމަ މިއީ މިފަހުން ރާއްޖޭގައި ނެރުނު ރޮމޭންޓިކް ކޮމެޑީތަކަށް ދޫނުކުރާވަރުގެ ފިލްމެކެވެ. މި ފިލްމުގެ ބަލަން ދިޔަ މީހުންގެ ތެރޭގައި ގިނަ އަދަދަކަށް ޒުވާނުން ހިމެނުމަކީ ވެސް ފިލްމުގެ ޕްރިމިއާ ނައިޓުން ފާހަގަކޮށްލެވުނު ހެޔޮ ފާލެކެވެ.
"ބައިވެރިޔާ" ފިލްމުގެ ޝޯތައް މިހާރު ވެސް ހަލުވިކަމާ އެކު ޓިކެޓް ވިކެމުން އަންނައިރު ފިލްމުގެ ޝޯތަކަށް އޮލިމްޕަސް ވަނީ ޑިސެމްބަރު މަހުގެ ނިޔަލަށް ބުކްކޮށްފަ އެވެ. އަންނަ އަހަރުގެ ޖެނުއަރީ މަހާ އެކު އަތޮޅު ތެރޭގައި ފިލްމުގެ ޝޯތައް ދެއްކުމަށް ހަމަޖެހިފައިވާއިރު މިހާރު ފިލްމުގެ ޝޯތައް ވިއްކަމުން ދަނީ 100ރ. ރޭޓުންނެވެ.